Imnanan tupad sa tunghaan

Gisakyan na sa mga opisyal sa gobiyerno ang kahigayonan nga gipaloagan sa Department of Environment and Natural Resources ang pagpreserbar sa mga karaang punoan sa nagkadaiyang klase sa kahoy.

Karong bag-o, si Department of Education-7 director Carmelita Dulangon mimando sa pagputol sa kakahoyan kon magdulot kini og kakuyaw sa mga tawo ug kabtangan.

Ang kamandoan ni Dulangon kinahanglang klarohon ug butangan og guidelines. Apan kon mando lang kini nga wala’y guidelines unsay pamaagi sa pag-ila sa punoan nga angay nang putlon ug angay ipabilin aron galmon, ug unsay pamaagi sa pagputol niini, angay gayud kining sawayon. Kon ang mando ni Dulangon lamang ang pabarogon, hayan moabuso ang mga prinsipal niini ug mamutol sila sa kakahoyan bisan kadtong dili pa angay putlon ug bisan ang mga kahoy nga wala maghatag og kakuyaw sa katawhan.

Maayo usab tingaleng awhagon ang Department of Environment and Natural Resources nga momugna og guidelines sa pagpamutol og kahoy nga giingong “hazardous” na sa mga tawo ug mga butang.  Ang DENR man ang nasayod ning butanga tungod kini man nga ahensiya ang gitahasan sa gobiyerno pagsuperbisar sa kalikupan ug tanang kabtangan sa estado, lakip na ang mga yutang gipanag-iya sa gobiyerno (timberland ug watershed) ug ang kakahoyan.

* * *

Kon moduaw ka sa Salinas Drive, ang lugar dili na sama kaniadto. Sadya na kaayo ang lugar ug nanguhong na ang mga establisamento.

Apan usa ka dakong institusyon nga nagbarog nianang maong karsada ang University of Southern Philippines Foundation ug ang Cebu Aeronautical Technical School.

Kaniadto ang USPF ug CATS pa lang ang nagbarog nianang lugara, moalegre lang panahon sa buntag ini’g sulod sa mga estudyante sa maong tunghaan, ug usbon sa hapon ini’g panggawas na nila. Hangtod nabuksan ang IT Park nga nahimong lugar sa mga dagkong patigayon, lakip na ang mga call center. Dungan sa pagdaghan sa call center sa IT Park, nanguhong sa Salinas Drive ang mga imnanan ug kan-anan.

Apan nahibulong ko nganong nakakuha og permit gikan sa Cebu City Hall ang mga imnanan sa Salinas Drive, ilabi na kanang anaa sa tupad gyud mismo sa USPF ug sa atbang nga sa akong nahibaw-an, gidid-an man ang mga imnanan 50 metros gikan sa bisan unsang tunghaan.

Dunay imnanan tupad gyud sa gate sa USPF. Nganong naa man kini diha Mayor Mike Rama? Kinsay nagtugot niini?

Adunay ginikanan nga miduol kanako ug miasoy nga utrong mga tinun-an nga mga foreigner mangahubog anha manghigda sa gate sa USPF.

Nganong wala man kini ireklamo sa school administration?

Kuyaw og adunay away nga mahitabo unya tempong tingsulod o tinggawas sa mga tinun-an.