V. Rama luag kun drayber disiplinado lang

Dalan. V. Rama gisugdan nag trabaho, diin ang kinatibuk-ang karsada gibahig makatulo: ang duha sa tulo gihimong agianan sa mga sakyanan samtang ang usa sa tulo maoy gibanatan pagkawot alang sa tukmang pundasiyon.

Kun dili lang mosulod ang mga behikulo sa dapit nga gikoral og kordon, dili gyud mahitabo nga matrapik pagdugay. Ang nakaparat lang, kay duna man guy drayber nga bentahoso. Imbes, mosunod sa hangyo nga: “Fall In One Line,” mosimang gyud. Maghimo gyu’g iyang kaugalingong dalan aron maangin og kalangay ang tanan.

Resulta, pag-abot sa gialing pahibalo: “Men at Work”, mangilog na sab sa single lane nga gisakripisyoha’g subay sa mga matinahorong drayber, kinsa nahibalo unsa ang matuod nga kahulogan sa ‘Road Courtesy and Discipline’. Luoy intawon kaayo ang mga buotang drivers. Kay sayonsayonon man la’g obertik sa mga bastos nga tsuper.

Ubay-ubay ni sila. Naglinya diha sa dalan nga dili unta dapat maoy agian. ‘Fall In One Line’ ra gyud ang gikinahanglan para smooth and swift sailing ang dagan sa mga behikulo diha sa gitrabahong V. Rama Avenue. Apan pirme giguba ning mga badlungong drayber, kinsa gusto gyung mouna pag-agi bisa’g maoy ulahing naabot.

Hinuon, husay ra man gihapon ang dagan sa trapiko sa V. Rama bisan ning gipakitang pagpabadlong sa mga badlungong drayber. Mosamot pa gyud unta katulin ang dinagayday sa trapiko niining lugara kun ang tanang drayber disiplinado diha sa inadlaw niyang pagmaneho ug may respeto sa isig ka ingon niya nga biyahedor. Ato ning sulayan, Bay! Be a friendly driver at all times.