Mga delikadong pagkaon (1)

Bisan sa kadaghan na sa nangamatay aning mga pagkaona, apan ang uban kompiyansa lang gihapon nga sige og kaon niini. Ambot wala pa sad tingali sila’y kasayuran kun unsa kini kakuyaw o kaha dili kaayo suheto mahitungod ini. Busa nakuryoso ko nga himuong tema karon, sa pamasin atong mailhan kun kini ba nahimo na natong naapil sa inadlaw nga pagkaon.

Segun sa report ni Marc Sahrsa Epoch Times niadtong Abril 10, 2014, iyang gipahimug-atan ang pagtuki sa mga pagkaon, sa tinguha nga maila ang mga benepisyong makuha niini. Apan may nadiskubrehan siyang mga klase sa mga delikadong pagkaon nga nahimong ampay na sa uban. Busa mahinungdanon nga ato ning matutokan pag-ayo aron kita malikay sa mahimong dautang epekto ini.

Boriring (Puffer Fish o Fugu)-Paborito kaayo ni sa Japan ug daghan na ang nangahilo niini gani daghan na pud ang nangamatay. Ang uban yanohon lang ni og kaon ilabi na nga ang apdo o tinai niini makahilo o makamatay.  Bisa’g unsa ka eksperto sa mokaon ini usahay mosipyat gyud. May klase niini nga kun masagol og kaon, usahay maderetso ka’g kamatay.

Gagmay’ng Kugita (Sannakji)-Ang uban nga mokaon niini kilawon lang nga pamutlan apan molihok pa ang mga gaway nga kuyaw mopilit ni sa tutonlan nga mopabara sa pagginhawa.Uso kayo ning kaona sa Japan.

Ackee –Usa kini ka Jamaican nga prutas, nga ang iyang lami mora’g keso. Kun kan-on  nga hilaw, makahilo o makamatay kini. Ambot naa ba kaha ni sa atoa.

Carsu Marsu-Hinuon tua lang kini sa Sardinia, Italya. Usa ni ka keso nga giproseso pinaagi sa pagpadunot o gipalata nga gipaitlogan sa mga langaw nga minggimok ang mga buhing semilya niining mora’g pinong ulod o bitok. Kuyaw ni makaon nga mga buhi pa tungod kay dauton o busloton niini ang imong tinai.

Kamoteng Bolanghoy (Cassava)-Daghan na sad ang nahilo o namatay gumikan sa pagkaon ini, nga dunay klase ini nga grabe makahilo gyud. Busa ayaw pagpataka og luto nga di ka suheto, kay malagmit usa ka unya sa maapektuhan sa maidulot nga kadaut niini sa panglawas mo.