Ang piso-piso lang

Matud sa uban, pobre kuno ang atong nasud tungod kay halos pobre man sad ang mga tawo nga lumolupyo niini. Morag sa paniid ko dili man kana ang atong sitwasyon. Kun pobre pa ang atong nasud nga mohangtud karon sige pa man ang bilyones nga gikurakot. Unya wa man lagi gidungog nga mabangkaruta ang Pilipinas. Gani ang Pilipinas karon usa na sa malamboong nasud sa Asia.

Kitang mga tawo basig maoy mga pobre? Dili man sad tingali kay makapalit pa man kita’g load sa celpon bisag way kaon. Bisag tiket sa lotto, magdoble pa aron kuno kita makatabang sa uban. Tan-awa di ba halos kada adlaw may mahimong milyonaryong Pinoy. Unya hayahay sad kaayo bisa’g mahal ang shabu, ilimnon ug sigarilyo, way angal kay makaabot man. Unya mao nay pobre?

Ang tinuod lang, datu man kita sa mga tinubdan pero kulang ta sa paagi ug sakripisyo, aron ato kini mapuslan. Wala lang ta magpursigir sa sekreto unsaon nga makwartahan kita nga mabuhing haruhay. Nasayud ba kita nga daghan nang mga kaliwat nato naarang-arang ang kinabuhi, gumikan lang sa piso-piso? Morag imposible di ba? Busa atong ipadayon nga tukion kun giunsa kini.

Duna koy na-interbyu nga kaila ko nga kaniadto sayud ko sa kalisud sa iyang panginabuhi. Apan nasorpresa ko dihang gibinlan lang siyag sampol sa kahimanan nga unya na lang bayaran kun kini makakwarta pinaagi sa piso-piso nga baligya sa tubig o Awtomatic Tubig Machine. Haskang kapila piloa ang ganansya (hapit mogatos) sa puhonan nga 15 pesos matag sudlanan (5 gallons).

Karon mao nay namutang sa ATM sa nagkalainlaing mga tindahan o kan-anan. Kada sudlanan gigahina’g kalas nga 3 ka piso para sa 3 ka anak niya, nga gisulod sa basiyong sudlanan sa tubig nga, kuhaon o iphon lang inig tapos sa tuig. Kada adlaw makabasiyo silag labing minus 20 ka sudlanan sa mga tindahan. Sa ato pa sa kalas lang makatigum sila’g 20x365=7, 300 pesos ang tuig.