Pahinumdom ug pahimangno

SEPTIYEMBRE 22, 2013: Ikakawhaag lima nga Domingo sulod sa tuig

Mga Pagbasa:  Am. 8;4-7/Sal. 113/1Tim. 2;-1-8/Lk. 16;1-13

Dili madugay binalhinay na usab. Kini ang kamatuoran nga nagpasabot nga ang tanan molabay lamang bisan gani sa mga parish assignments. Bisan asa ang mahinungdanon ikaw malipayon ug malinawon.

Apan kabahin sa pagkatawhanon mao ang paghimo og pagtandi sa ekonomikanhong kahimtang sa imong gigikanan ug sa imong padulngan nga parish assignment. Dili lang kini mahitungod sa kura kun dili usab sa mga coadjutor. Apan kun sumadahon ang “grasya” modagayday ra kay kini anaa sa matag usa nga miyembro sa parokya ang mahinungdanon mao lamang nga ikaw magkugi ug maningkamot nga imong mahatagan og hustong pag-alagad ang imong parokyano.

Apil na niini ang pagpangisog kun kinahanglanon ug sugo sa panahon. Kay diha sa pagpangalagad dili mahimo ang pagpunay og yango-yango sa mga beata nga murag nakatag-iya og pari ug simbahan. Adunay mahimo natong uyonan apan dunay dili mahimong isakripisyo nga baruganan. Subo lang palandungon nga ang uban buot lang modawat sa grasya ug magdumili diha sa pagsakripisyo. Kay mogikan ug Domingo mobalik ra pud ug Domingo kay mopupho sa hinagoan sa uban. Mao nga angay na silang moretiro kay kun sa negosyo pa nakadugang sila sa deficit.

Tinuod dili gyud mawala ang isyu sa kwarta ug bahandi bisan asa pa kita. Apan angay lang unta natong matngonan nga sila lumalabay lamang. Ang magpabilin mao ang paagi nga kita nagpakabuhi ginamit ang salapi. Nakatabang ba kini sa atong paglambo ingon nga tawo? Nakapa-santos ba kini kanato o nakapanudnod na ba hinuon kanato ngadto sa impiyerno?