EDITORYAL - Pope Francis gustong mosilbi sa mga kabus

Si Pope Francis  nangandoy  nga   tanang  mga  kabus pasimbahon gyud  kanunay aron  nga  di  na  ni  mogawas  sa Katoliko.

Alang  kaniya  wa na  siya’y  problema  sa mga datu  tungod  kay  lig-on  na  kaayo  ang  baruganan  niini  nga  bisan  unsay  mahitabo  sa kalibotan mobagyo, molinog  o kaha  mobalik  si Cristo  wa nay makatandog  sa ilang  pagka-Katoliko.

Nia  dinhi  ang  tanang  maalamon  nga  tawo  sa kalibotan, tanang   adunahan , nia ang  tanang  kalingawan  sa kinabuhi  sa tawo  ug wa ka nay  pangitaon  pa  kay ania  ang  tanang  gikinahanglan  sa tawo  aron mabuhi  nga  puno  sa kalipay.

Mao  nga  way  kabalak-an  si Pope  Francis  kay  nakasandal na  sa pader  ang  1.2 milyones  nga membro  sa Katoliko  kansang  kalig-on  di  na  matandog pa  bisan  unsay  mahitabo  sa kalibotan.

Gani  dali  rang  modoble kining  maong  gidaghanon  tungod  sa kapaspas  sa  pagsanay  sa  mga  kabus  nga  mga  membro  niini.

Mao  man  gani  nga  sa mga maayo  kaayo  mokuwenta, kining  gidaghanona  sa  membro  nga 1.2 bilyones  kun  sa matag  misa  mohatag  lang  og  tag-peso  kada  usa, aw tataw  kaayo  nga  bisan  kausa  lang  manimba  ang  tanan  sa usa  ka buwan,  kada  buwan  mokita  ang  simbahan  og P1.2 bilyones.

Sa panahon  ni Cristo  niadtong  dinhi  pa  Siya  sa yuta  may gitukod  Siyang  relihiyon  ug  mao man gani  nga  gumikan  kay pipila  ra  ang nagpasakop  sa Iyang  relihiyon, wa kini  kasalbar  Kaniya  dihang  gidakop  siya  ug  gilansang  sa krus ug gipatay.

Kuwang  siya  og  puwersa  nga miprotiher  Kaniya, ug  dali   ra usab  kaayong napapas  ang  maong  relihiyon  dihang  ang  gibinlan  ni Cristo  sa  Iyang  pagsaka  sa langit  nga mao  ang  mga  Apostol,  nangamatay  usab.

Ang  pipila  sa mga  membro  sa relihiyon  nga  nahabiling  buhi  dihang  nangamatay  na ang  mga Apostol gipamatay  usab  sa  mga kaliwat sa  mga  tawong  mipatay  ni Cristo busa  sa hingpit nga  nawagtang  ang  relihiyon  ni Cristo.

Apan  tungod  kay  may  tagna  sa  Biblia  nga mobangon  kini ning katapusang  mga  adlaw,   natuman kini  ug  usa  kini  sa bahin  sa  Iyang  relihiyon  nga  Iyang  balikon .

Apan sama  kaniadto  sa Iyang  panahon  sa  wa  pa  Siya  mamatay dinhi  sa yuta  nga dyutay  ra  ang  Iyang  mga  sakop, mao  gihapon  karong  panahona  dyutay  ra kaayo   kun itandi  sa di  membro  sa Iyang  relihiyon.