Maskara
Mapasigarbohon si Mayor Michael Rama sa Cebu City Medical Center tungod sa dakong kausaban sa maong tambalanan.
Nindot na og hitsura ang CCMC kun itandi sa nanlabay'ng katuigan nga magtan-aw ka sa dagway niini mahadlok kang mosulod aron pagpatambal.Karon bag-o na ang pintal ug mas limpiyo na ang CCMC. Way lalis ug way duda niini.
Gani gipasidunggan ang CCMC isip outstanding department atol sa Charter Day Celebration sa dakbayan.
Apan dili sukdanan ang kaanindot sa edipisyo aron ipasigarbo ang usa ka departamento. Dili sukdanan ang maayong hitsura, pintal ug uban pa'ng butang makita sa gawas nga maisip lang nga usa ka maskara aron maingon nga malampuson ang usa ka buhatan.
Mamahimong usa ni sa mga timailhan sa maayong liderato sa buhatan apan ang labing importante ug alang nako maoy angayang taksanan sa paghatag og pasidungog mao ang maayong serbisyo.
Taliwa sa maayong hitsura sa CCMC, ang pangutana natagbaw na ba ang publiko sa serbisyo niini?
Duna bay igong tambal nga magamit alang sa mga kabus nga pasyente sa dakbayan? Dili ba haplas ray mahatag nga libre sa mga pasyente?
Labaw kay sa maayong hitsura angayang unahon sa dakbayan ang libre nga tambal ug maayong serbisyo. Kanang serbisyo nga dili sika-sikaan ang mga kabus nga pasyente.
Ang tinuod hangtud ron dili gihapon maayo ang serbisyo sa tambalanan. Daghan gihapon sa mga kabus nga pasyente ang nangreklamo tungod sa dili makatagbaw nga pag-alagad.
Kuwang pa gihapon ang tambal alang sa mga kabus. Daghan pa gihapon ang magtiyabaw tungod kay dili madapatan og tambal ang ilang pasyente kun dili makapalit og tambal gikan sa botika gawas sa hospital.
* * *
Sa miaging adlaw gibuksan sa Kapisanan ng mga Brodkaster ng Pilipinas dinhi sa Sugbo ang 16th Cerge M. Remonde Chapter Leaders Conference diha sa Castle Peak Hotel.
Ang kalihukan gitumong aron sa paghatag og update sa mga opisyal sa maong kahugpongan sa kalihukan sa broadcast industry. Alang sa mga participants sa tinuig nga panagtigom sa mga opisyal sa KBP, welcome sa Sugbo. Hinaut malipayon ug mabungahon ang inyong pagpuyo sa Sugbo sulod sa pipila ka adlaw.
Congratulations sab sa mga opisyal sa KBP-Cebu Chapter pinangulohan ni Sir Marlon Baula sa pag-host sa maong kalihukan.
- Latest
