Unsaon pag-transfer sa yuta nga gidonar

Kun ikaw modonar og yuta o bisan unsang real property ni bisan kinsa kinahanglan nga aduna gyuy pirmado nga Deed of Donation sa donor ug adunay acceptance sa tawo nga gihatagan niini. Ang maong Deed of Donation kinahanglan nga iparehistro sa Register of Deeds kun titulado ang maong property aron kini mapatik sa ilang registration book. Unsay paagi sa pag-transfer sa yuta nga gidonar? Kana nga pangutana ang atong tubagon karon.

* * *

Dear Atty. Divine,

Aduna lang unta ko’y ipangutana nimo labot sa property nga gustong ihatag ni lolo ug lola ngari nako. Nagdako ko sa akong lolo ug lola ug sila  ang nagbuhi  nako kay illegitimate child man ko ug aduna nay laing pamilya ang akong mga ginikanan. Si lolo ug lola maoy nagpa-eskwela nako ug karong bag-o ila kung gisultian nga aduna sila’y yuta nga ihatag ngari kanako. Wa mi kasulatan pagkakaron Attorney labot sa yuta nga gusto nilang ihatag ug ang akong pangutana kun unsa man nga dokumento ang among ipahimo aron maklaro ang paghatag nila ni lolo ug lola sa ilang yuta ngari nako. Titulado ang maong yuta attorney ug plano unta nako nga ibalhin sa akong pangan, unsa may angay nako nga buhaton aron kini ma-transfer? Hinaut nga imong matubag ang akong pangutana. — Roger

* * *

Dear Roger,

Ang una nimong buhaton mao ang pagpahimo og Deed of Donation nga pagapirmahan sa imong lolo ug lola. Kun aduna kay abogado nga kaila mas maayo nga adto ka niya magpahimo aron siya na lang sab ang monotaryo sa maong Deed of Donation. Aron mabalhin sa imong pangan ang maong property human kini mahatag kanimo, ang sunod nimong buhaton mao ang pag-adto sa Bureau of Internal Revenue kon BIR aron sa pagbayad sa mga gikinahanglan nga buhis sa maong donasyon. Ang BIR mo issue og Certificate Authorizing Registration kon CAR sa higayon nga mabayran na ang tanang buluhisan sa maong yuta lakip na ang Donor’s tax ug human niini, imong iduso ang Certificate Authorizing Registration ngadto sa Register of Deeds diin nahimutang ang maong yuta. Ang maong donasyon irehistro unya sa Register of Deeds sa ilang registration book ug unya  mo-issue sila og bag-ong titulo sa maong yuta ubos na sa imong pangan. Hinaut nga akong natubag ang imong pangutana. — Atty. Divine

* * *

Alang sa inyong pangutana, ipadala lang sa Legal Corner sa Banat News or email sa [email protected].