Sa kasaysayan, gibugal-bugalan sa mga langyaw nga Katsila ug Hapon ang mga Filipino kaniadto, ug ang tarong nga langyaw nga modominar sa kabus nga Pilipinas mao ra ang mga Amerikano.
Apan kun nakahimo man pagyatak ang mga Katsila ug Hapon kaniadto gumikan kay nasud-ong nila nga ang mga Pinoy, way ikasukol kanila, di na tingale kini mahitabo karon.
Kaluoy baya usab kaha sa mga Filipino nga nainila na kini karon sa tibuok kalibotan gikan sa iyang kaisog ug ka-edukado unya magpayatak lang gihapon sa mga Insek.
Ang gisaad ni PNoy sa iyang state of the nation address (SONA) niadtong Lunes nga iyang sangkapan og modernong mga ekipo ang mga sundawo sa armadong puwersa sa nasud , makapadasig baya sa mga Filipino.
Kay daghan man gud ang nagtuo nga ang pagpanghulga nga gihimo sa mga Insek batok sa mga Filipino aron ilugon niini ang mga isla sa Spratly lakip na ang Scarborough Shoal mokupoy na lang ug magpabahag sa ikog ang mga Pinoy.
Kita isip mga Pinoy, kaluoy baya kun mao kini ang mahitabo kay nagtuo man kita nga husto na ang nanglabay nga mga panahon sa atong mga ginikanan kaniadto nga giulipon sa mga langyaw tungod sa kakabus ug way ikasukol batok kanila.
Karon nga ingon na niini ang atong kahimtang nga layo na kaayo ang gintang sa atong pagkabutang sa natad sa panginabuhi, edukasyon ug sa puwersa sa depensa, itandi kaniadto sa panahon sa mga Katsila ug mga Hapon, iningnon lang gihapon ta karon sa mga Insek?
Oi pagkadimalas baya nato, kay ngano ba ang mga opisyal nato nga maoy nagdala sa rinda sa atong panggobyerno magpabilin lang gihapong tanga nga bisan yatakan na ang atong katungod igo lang kitang motibi kay way ikasukol?
Pagkapait baya, busa dako kita og pagtuo nga tinud-on gayud sa atong pamuno nasud ang bahad nga panalipdan sa atong mga sundawo kutob sa mahimo ang atong mga kabtangan sa West Philippine Sea batok sa mga Insek nga buot moilog niini. Di ba?