BRGY CALATRAVA, CARMEN, BOHOL
“Naunsa naman ning tunghaan namo diri Sir nga dagko kaayo ang tampohan kun dili makatambong ang meeting usahay maabot gud og 100pesos, maayo untang masusi ni diri sa taga department of education kay murag dili man makatarunganon.”
BRGY CABANGCALAN, MANDAUE CITY
“Diri sa sitio Pilit bisag gamay ra’g uwan mobaha man dayon tabangi intawon mi ani Sir nga masulbad ning problemaha kay kaming mga taxi driver nabalaka na nga masakit tungod sige’g tunob aning bahaanan nga lugar duol sa among grahian.”
BRGY POBLACION, BADIAN, CEBU
“Migrabe naman ning sugal nga hantak diri sa among lugar hapit kada adlaw ni mahitabo, among mga anak usahay dili na mosulod sa klase kay tua na mag apong sa hantakan unya ang mga polis diri wa may pakabana.”
BRGY BASAK-SAN NICOLAS, CEBU CITY
“Diri sa among lugar kay naay polis diri nga nagranggo og PO2 abusado kaayo kun makainom kay kun mahubog sige mag panion og armas sa iyang makainom, hambugero man gud kaayo ni polisa uy maayong mataktak sa serbisyo.”
BRGY LANAO, MOALBOAL, CEBU
“Palihog tawon mig dokdok aning among mga opisyal sa barangay sir Jun kay wala man silay gihimo aning mga namaligyag illegal nga drugas diri nga klaro man kaayo ning mga nalambigit ani nga kalihukan, mura man silag mga buta ug bungol.”
BRGY POBLACION, BARILI, CEBU
“Sa sitio Daro problemado gyod mi kay kami ra gyod ang way tubig diri nga unta duol ra kaayo mi sa lungsod, dugay na kaayo ning problemaha pero wala man gyoy nakahatag katumanan sa among gipangandoy nga tubig ang milingkod nga mga opisyal.”
BRGY TEJERO, CEBU CITY
“Hangyo unta mi sa mga opisyal sa barangay nga hawanan unta sa mga trak nang kilid sa juasing kay kun dunay emergency maglisud gyod og agi dugay makalusot ang sakyanan, maayo unta’g molihok ang mga opisyal sa barangay mintras wa pay emergency “
BRGY ESTACA, COMPOSTELA, CEBU
“Naunsa naman ning among karsada diri sa purok Nangka nga gihimo naman hinoon agianan sa tubig sa kanal mao nga gubaon na kaayo unya lapok pa gyod pirme, wala gyoy aksyon ani ang among mga opisyal sa barangay.”
Alang sa inyong mga reklamo text lang sa 09071678643