Invisible Ruben

Si Dinagat Kong. Ruben Ecleo, Jr., supreme master sa Philippine Benevolent Missionaries Association (PBMA), nga kaduha na makombikto sa mga kaso nga gipasaka batok kaniya, wala gihapon madakpi hangtud karon.

Samtang nagtoo kita nga mas sayon areglohon ang mga huwes nga naghupot sa iyang mga kaso, lahi si RTC Judge Soliver Peras nga mikombikto kang Ecleo sa sumbong parricide tungod sa iyang pagpatay sa iyang asawa, Alona Bacolod Ecleo. Final and executory na usab ang hukom sa Sandiganbayan niadtong Enero tungod sa iyang kasong graft.    

Apan anugon kining mga desisyon sa isug ug tarong nga mga maghuhukom kay dili man mapriso ang ilang gikombikto. Inutil ba ang kapin sa 140 mil ka mga sakop sa Philippine National Police (PNP) nga wala gayud makadakop sa PBMA leader o nagpabutabuta lang sila?

Kinahanglang tutukan sa atong mga tinugyanan sa balaud ang Dinagat island nga maoy gingharian sa kombiktado. Dinhi siya protektado sa iyang mga tawo ug di na kinahanglang magtagotago pa.

Gihimo na ba kini sa PNP o adunay mga politiko nga nagkwelyo kanila aron dili hilabtan si Ecleo nga daku'g matabang panahon sa eleksiyon. Makauuwaw kini sa tibook PNP organization. Mas maayo tingali nga ila nalang ipatoo nga dili nila makit-an si Invisible Ruben.

* * *

Misalida dayon ang mga politiko aron kunuhay pagpanalipod sa mga molupyo sa Sitio San Miguel, Bgy. Apas, Cebu City- kang kinsang mga balay gikatakdang panggub-on niadtong Lunes.

Kining maong kaso nagsugod niadtong panahon nga mayor pa si Kong. Tomas Osmeña apan nganong karon man lang sila mangisog? Mikaransa usab dayon ang mga konsehal nga mora og mga robot nga gimaniobra sa remote control ni Osmeña. Igo nalang unta silang mosuporta inay magsamoksamok sa mga lakang ni Mayor Rama nga mao ang amahan sa siyudad.

Klaro ug tataw kining ilang gihimo kay umaabot na ang eleksiyon. Mao ni gitawag og "in aid of re-election/election." Maantigo hinoon mosilot ang taga-siyudad niining mga oportunistang politiko.

* * *

Mikakak na si Transportation Sec. Mar Roxas. Dili pa lang dugay, gipahibawo niya nga dili siya modagan pagka-presidente sa nasud. Nasayud man gud tingali si Roxas nga maglisud siya batok kang Bise Presidente Jejomar Binay. Siguro hinoon ang iyang kadaugan kon molansar siya pagka-senador.

Ato usab nga makita nga si Pres. Aquino dili buot makigbuwag kang Binay nga suod sa ilang pamilya sukad pa sa panahon sa iyang inahan, anhing Pres. Cory Aquino.

Apan dili pa baya angayang mokompiyansa si Binay kay anaa pay mga personalidad nga buot moparang kaniya sama kanila ni Sen. Bongbong Marcos, Sen. Bong Revilla ug Kris Aquino. Nasayud na baya kita nga ang makapadaug sa usa ka kandidato mao ang masa.

* * *

Ako kamong dapiton sa pagtan-aw sa "CCTN News" live sa Channel 47 matag adlaw gikan sa Lunes ngadto sa Biyernes alas 5:00 - 5:30 sa hapon. Replay niini sa 11:30 - 12:00 kada gabii. Mao kini ang gi-reformat nga "Balita Karon" diin pares nako si Jonalyn Jumabes.

* * *

Email: [email protected]