"He who comes to court should come with clean hands."
Ang maong prinsipyo sa hustisya angayang subayon ug tamdan sa tanang higayon.
Sa nahitabo ni Chief Justice Renato Corona way bisan usa sa 188 ka mga kongresista nga mipirma sa articles of impeachment ang makapangangkong limpiyo.
Apan kun imo silang pamation lupig pay santos nila. Kun makaatubang sa camera labihan ka pagarpar apan maglisod gani og depensa sa ilang mga argumento.
Pero sagdi nalang kay bisan sa kabutbuton sa mga sakop sa prosecution ato man gihapong nasayran ang mga importanteng kasayuran nga angayan natong masayran pinaagi sa tabang sa mga senador.Bisan og wala magkadimao ang presentasyon sa prosecution sa ilang kaso apan pinaagi sa mga senator-judges nalugit ang mga detalye nga wala makuha sa mga sakop sa prosecution panel.
Duna hinuoy dili gyud mahibaw-an sa publiko ug dili mamahimong makatabang nato ang mga senador niini, ang pagpugos sa mga kongresista nga naglangkob sa proesution panel batok ni Corona pagtug-an sab sa ilang kaugalingon nga mga Statement of Assets Liabilities and Networth.
Sigurado ko nga sama ni Corona nga ilang gilutos daghan pud nila ang kadudahan giunsa pag-angkon ilang kabtangan.
Dili kaha maayo nga ang tanang kongresista nga namirma sa impeachment batok ni Corona moladlad pud sa ilang SALN?
Sa ingon niini mahatagan sila og kridibilidad paghimo sa ilang tahas ug mamatud-an sab nga limpiyo ang ilang mga kamot ug angayan sila nga mohimo sa paglutos kang Corona.
Maayo nga mangulo sa pagtug-an sa iyang SALN sa publiko mao si Iloilo Rep. Neil Tupas Jr.
* * *
Hapit kada adlaw sa miaging semana gipresentar sa City Hall ang mga department heads aron ipakita sa publiko unsa kadako ang epekto sa paglaslas sa budget ngadto sa ilang mga programa labi pa ang paghatud sa batakang serbisyo.
Usa sa mga miatubang mao si Engr. Dionisio Gualiza sa Department of Public Services.
Matud ni Gualiza nga posible kuno nga maapektohan ang pagkolekta sa mga basura.
Sumala pa niya nga dili na nila makaya ang pagpaayo sa mga garbage trucks tungod sa kakuwang sa budget.
Dili lang ang DPS kun dili tanang departamento ang nangreklamo. Kun mao hain man diay mopaingon ang usbaw sa annual budget karong tuiga?
Sa miaging tuig kapin lang sa P4 bilyones ang budget apan karon miabot na sa kapin sa P5 bilyones.
Kun naatiman sa dakbayan ang batakang serbisyo sa miaging tuig nganong karon nga mas dako na ang atong budget dili naman hinuon makaya ang gastohan?
Tataw nga propaganda ang gihimo sa administrasyon ni Mayor Michael Rama.
Usa ka "lousy" nga matang sa propaganda.
* * *