Kada tingbukas sa klase, magmalipayon gyod ang mga ginikanan lakip na ang ilang mga kabataan nga nagtungha sa nagkalainlaing eskuylahan sa elementarya sa tibuok lalawigan sa Sugbo. Ngano man? Tungod kay ang Kapitolyo adunay giandam nga mga backpacks, bawnanan sa pagkaon, papel, notebooks, lapis, ballpen ug uban pa.
Makadawat gyod niining matanga sa school supplies ang matag tinun-an gikan sa primero hangtod sa sixto grado.
Gisugdan ni Gobernador Gwen Garcia kining nahisgotang proyekto sa paglingkod pa niya sa iyang unang termino kaniadtong 2004 ug gipadayon kini niya hangtod karon aron makatabang bisan sa diyotay'ng paagi ngadto sa atong mga ginikanan nga matibhangan unta ang ilang galastohan atol ning tingbukas sa klase matag tuig.
Usa kini sa mga maayong hiyas sa pagkamanggihatagon sa atong gobernador nga gitiman-an ug gimanggad sa hilabihang kahinangop ug kalipay sa atong mga ginikanan ug mga kabataan sa mga kasiyudaran ug mga kalungsoran sa atong lalawigan.
Una pa kining higayon sa atong kasaysayan nga ang Kapitolyo manghatag og mga school supplies ngadto sa atong mga kabataan nga nagtungha sa nagkalainlaing dapit sa lalawigan sa Sugbo.
Gumikan niini, itunol nato ang atong mainitong pasalamat ngadto kang Gobernador Gwen Garcia ug sa tanang opisyales sa Kapitolyo sa ilang maayo ug dalaygong binuhatan ngadto sa atong mga tinun-an sa elementarya. Keep up the good work, Governor!