EDITORYAL - Si PNoy ug ang lider sa MILF

Ang gihimo ni Presidente Benigno Aquino III nga hilom nga pagpakigtagbo kang Al Haj Murad Ibrahim nga lider sa MILF didto sa Tokyo usa ka bayanihong desisyon sa usa ka lider nga gustong makatagbo sa nawong sa lider sa grupo nga naghatag og kahasol sa Mindanao.

Ang kasamok nga gidalit sa MILF sa Mindanao dako kaayo ug dugay na nga wa masulbad sa tanang mga president sa nasud nga nahauna pa kang PNoy.

Ang iyang gihimo usa ka inisog nga lakang nga way laing tumong kundi ang pagsukod kun unsa gyud diay ang lintunganay niining paghasol sa MILF didto sa Mindanao ug unsa usab gyu’y bugtong solusyon nga makapahunong sa maong grupo sa ilang pagpanggubot sa Mindanao.

Busa di usa ka bag-o ug binuang ang tumong sa presidente sukwahi sa pasangil sa iyang mga kaatbang, kundi mao gyud ni angay nga buhaton sa usa ka lider nga mogamit sa inutok nga paagi.

Lahi man ang lider nga magpunay lang og salig sa iyang mga tawo, kay kun adunay ipangutana ang publiko di siya makahatag og konkretong tubag lahi kang PNoy nga siya mismo mao gyu’y nakig-estorya nawong sa nawong kang Ibrahim.

Ang lider nga husto di baba ang palihukon kundi ang buhat maoy ipakita ilabi na sa pagsiksik og mga solusyon sa mga dagkong suliran sa nasud.

Karong nasayud na siya sa personal nga baroganan sa lider sa kaaway sa gobyerno sa Mindanao, aw may ikabutyag na siya sa mga Pilipino tungod kay siya mismo personal mang nakasinati sa sentimento sa maong lider.

Apan kun mapakyas man ang gitakdang panagtagbo sa mga peace panel sa duha ka habig didto sa Malaysia karong Agosto 22-24, 2011 o kaha hangtod matapos ang termino ni PNoy magpabilin lang gihapon ang pagpanggubot sa MILF sa Mindanao, aw di mabasol ang presidente sa katawhan kay siya mismo may personal mang lakang nga gihimo.

Ug kining butanga posibli kaayo tungod kay ang MILF ug NPA di maglayo og prinsipyo nga bisan unsa pay lakang nga himoon sa gobyerno sa nasud mopadayon gyud sila sa pagpanggubot sa katawhan. Di ba?