Sumala sa mga chemist, ang tubig adunay stability index. Kini maoy magpakita kun unsa ka-stable ang tubig kalabot sa mga kemikal ug mineral nga anaa sa immediate environment niini.
Sa iyang kinaiyanhong kahimtang, ang tubig nagtinguha pagkab-ot sa zero o neutral index. Kun ang tubig adunay positive index sa usa ka given temperature, mo-release ug mo-precipitate kini sa mga mineral nga natunaw niini.
Ang tubig nga giagi sa proseso sa distillation ug reverse osmosis adunay naghingapin nga negative stability index. Kining maong tipo sa tubig aktibo kaayong mosuyop og carbon dioxide gikan sa hangin ug kini makapahimong acidic sa tubig.
Sumala sa mga pagtuon, kun ang tawo moinom lang og ginagmay sa distilled ug reverse osmosis water sulod sa hamubong panahon, aduna kini special property sa pagsuyop sa toxic substances sa lawas ug pagtangtang niini. Kini mahimong usa ka paagi sa paglimpiyo nga makaayo sa lawas.
Apan dili maayo ang kanunay ug dugay nga pag-inom og distilled o reverse osmosis water, matud sa mga eksperto. Kini tungod kay ang regular ug long-term nga pag-inom og ultra-pure, demineralized water posibleng mohikaw sa lawas sa gikinahanglan niining calcium, magnesium ug trace minerals.
Ang Canadian physician nga si Dr. Zoltan Rona mimatuod nga less deficient ang mga tawo nga misuplemento og trace minerals sa ilang purified water intake. Ug adunay siyam ka trace minerals nga gikinahanglan sa lawas sa tawo. (Sunod: Tinubdan sa trace minerals)