Sa usa ka da’n sa dakbayan sa Sugbo, akong nahimamat ang usa ka lolo nga nagpaabot og kasakyan nga dyip. Samtang nagpaabot og kasakyan, gibuhos ni lolo ang iyang atensyon sa pagbasa og usa ka mantalaan. Ug human sa pipila ka minute, nagbagulbol na si lolo sa iyang nabasa mahitungod sa bag-o nasab nga impeachment complaint nga gipasaka batok ni Presidente Arroyo. Nagtuo ko nga dumadapig sa presidente si lolo tungod kay pirte siyang nakayaw-yaw batok sa mga kongresista nga nidungog sa reklamo. Apan sa dihang akong gipangutana, simple lang ang iyang tubag—wa’y kapaingnan ang susamang reklamo sa usa ka balay balauranan nga kasagaran sa mga kongresista mga dumadapig sa presidente. Gitataw sa usa ka Sugbuanon, bisan kung taga liog pa ang mga akusasyon batok sa presidente, wa’ kini padulngan. Apan alang sa mga Pinoy nga nag-antos sa krisis sa ekonomiya, nakatabang ang maong pagdungog aron makakatawa ang mga tawo sa giingon ni lolo nga away sa mga bakakon.
Nagsugod na sa pagtuyok ang imbestigasyon sa komitiba sa hustisya sa ubos balay balauranan nunot sa kasong impeachment nga gipasaka batok ni Presidente Arroyo. Ug alang sa mga tawo nga naka-obserbar sa panghitabo sa kongreso, wa’ nay bag-o sa mga ebidensya nga gi-presentar gawas nalang siguro sa pormal nga pagtistigo ni kanhi house speaker Jose de Venecia atubangan sa iyang mga kauban sa buhat. Apan unsa bay bag-o sa mga akusasyon ni JDV nga kung buot huna-huna-on dugay nang gisaw-an sa katawhan ang maong matang sa kontrobersiya. Sakto si Cardinal Vidal, sa kadaghan sa mga pagdungog nga nahitabo sa kongreso ug senado, may mga balaod bang napanday ang maong mga opisyal nga mao gyud ang ilang labing mahinungdanong tahas.
Away sa mga bakakon. Sakto si lolo sa iyang obserbasyon. Nganong wa’ man gipaak sa publiko ang pamahayag ni JDV batok sa presidente? Tungod kay kung buot tan-awon, wa’y kalainan si de Venecia sa mga politiko sa nasud nga grabeng nakabenipisyo sa gobyerno. Gibutyag ni JDV nga usa siya sa nahatagan og tunga sa milyon ka pesos aron lang ibasura ang kaniadto impeachment case sab nga gipasaka batok sa presidente. Giklaro ni JDV, wa’ niyang magamit ang maong salapi og andam siyang ibalik ang kuwarta o itugyan sa Catholic Bishop Conference of the Philippines ang maong salapi. Ang pangutana sa mga ordinaryong Pinoy sama sa akong nahimamat nga usa ka lolo, wa’ gyud kaha niya magasto ang salapi o may igo siyang kuwarta aron ihulip sa iyang nagasto nang tunga sa milyon? Kung gisuwat palang unta ang serial number ug identification sa kuwarta, masakpan unta kung namakak ba o wa’ si JDV.
Apan nganong mingaw man o daw sa wa’ manginlabot ang publiko sa bag-ong impeachment batok sa presidente itandi sa panahon ni kanhi presidente Erap? Kini tungod kay pulos mga bakakon ang mga nag-akusar sa presidente ug alang sa publiko, dako man o gamay ang ilang nahimong bakak, wa’y ni kalainan—pulos sila mga bakakon. Nisibaw karon ang pangutana sama ni lolo. Kung maayo pa unta ang relasyon ni JDV ug ni presidente Arroyo moabot kaha sa punto nga iyang ibutyag ang tanan niyang nahibaw-an mahitungod sa ZTE deal ug ang giingong pakigduwa sa presidente og golf sa mga tag-iya sa maong kompaniya? Kung di’ palang usa ang anak ni JDV sa mga ni-bid sa maong proyekto, may katakus kaha ang kanhi house speaker sa pag-atubang sa publiko ug pagbutyag sa iyang nahibaw-an?
Kung nganong sa tanang panahon, nganong karon raman nahatagan og kaisog si JDV sa pagbarug aron akusahan ang presidente nga giisip niyang kanhi suod nga higala? Kung wala palang mabugto ang maayong relasyon sa pamilyang Arroyo ug mga de Venecia, wa’y JDV nga mogawas sa publiko aron iyagyag ang tanang mga nahibaw-an. Hangtud karon, magpabilin untang itago ni JDV ang tanan niyang mga nahibaw-an kung wa’ palang siya mapiit ining maong isyu. Too late the hero, kini ang reaksyon sa sagad sa mga tawo. Tungod kay bisa’g asa nga anggulo tan-awon, wa’y kalainan ang kanhi speaker sa ubang mga politiko nga giingong nag-doktoral na sa ilang pagkabakakon.
Nganong nahalin man ang impeachment case batok ni Erap sa mga Pinoy kaniadto? Tungod kay mga ordinaryong tawo nga may kaisog nga nibarug ug nisaysay sa ilang mga nahibaw-an batok ni Erap. Apan karon, hangtud nga mga politiko ra ang bida sa nagpadayon pagdungog sa committee on justice sa impeachment case, wa’y laing kapaingnan ang reklamo gawas sa basurahan sa kamara. Hangtud nga away sa mga bakakon ang atong makita, wa’y luna ang kamatuoran sa pagkakaron.