Gipanghimakak sa Malacañang ang balita nga nagplano kini sa pagpahamtang og buhis sa short message services (SMS) kon texting sa cellular phone.
Ang maong denayal kon pagpanghimakak sa Palasyo giluwatan human morag nalahugay ang katawhan dihang nigawas ang balita bahin sa text tax proposal.
Gisupak sa pipila ka mga lider sa Senado ang maong giingong plano.
Maayo rang giklaro sa Malacañang nga walay plano nga buhisan ang text messaging kay nahuwasan ang mga cellphone owner, ilabi na ang mga kumon nga tawo, kinsa nabalaka kini nga mapun-an pa gyud ang ilang gastohanan sa pagkupot og cellphone.
Ang SMS kon texting gud maoy labing barato nga paagi sa pag-communicate ug mao ra ni ang ma-afford kon maabot sa mga kabus tang kaigsuonan lakip kadtong tua sa kabukiran ug mga nahibilin nga sakop sa pamilya sa mga OFW.