Kinahanglang ipadayon ang cha-cha

Kaniadtong Domingo gipahigayon sa nagkadaiyang hot-ong sa atong katilingban nga gipangulohan sa Catholic Bishop Conference of the Philippines kon CBCP, ang dako nga prayer rally didto sa Luneta. Ang katuyoan sa maong kalihukan mao ang pag-ampo aron malamdagan ang kagamhanang Arroyo nga naputos sa mga dili maayong patakaran sa iyang pagpadagan sa kagamhanan. Usa niini ang maka-uulaw nga paglugos sa atong mga kongresista sa ubos balay balauranan, sa giya sa pag usab sa batakang balaod. Ang "Hello Garci" nga kontrobersiya, ang Mayoga report ug ang pagtabon sa kaso ni Agriculture undersecretary Jocelyn "Jocjoc" Bolante nga nalambigit sa 700 kapin ka milyon ka pesos nga fertilizer fund scam.

Ang Charter Change nga ipaagi sa Constituent Assembly gibabagan sa simbahang katoliko ug ubang mga relihiyosong grupo, negosyante, aktibista ug mga militante, akademiya, civil society ug uban pang nagpakabana kana gumikan kay tataw na kaayo, nga ang kahakog na sa gahum ang mipatigbabaw sa mga kongresista sa dihang ilang gipalabang ang resolution 1450 nga nag-umol sa kongreso ngadto sa Constituent Assembly nga walay participation ang Senado.

Sa prayer rally kagahapon giklaro sa CBCP nga supak sila sa Charter-Change pero uyon sila sa Character Change.

Sakto ang simbahan sa ilang baruganan. Sa kadaghan ko na balika, ang pag-usab sa atong batakang balaod dili mao ang suliran dinhi sa nasud. Ang suliran mao ang kinaiya ug ang values sa atong mga lider, busa kini mao ang angayan nilang usbon og dili ang atong Constitution. Busa akong panawagan sa tanang katawhan, isalikway ta ang Charter Change ug suportahan ta ang giduso sa simbahan nga Character Change. No to Charter Change! Yes to Character Change.

Sa umaabot nga bugnong lugaynon, ibasura ta ang mga politiko nga basura ang panglantaw sa atong nasud, basura ang kinaiya ug walay moralidad. Hulipan ta sila sa mga tawo nga atong gitohoan nga anaa ang tinuoray nga gugma sa nasud. Ang nasud wa manginahanglan og basura nga mga politiko. Nanginahanglan kini og tawong matinodanon nga moserbisyo.