Ika-20 anibersaryo ng PSN

Itong March 17 ay hindi ko malilimot

Pagka’t kaarawan ng dyaryong Tagalog;

Pilipino Star NGAYON –pangalang matunog

Ito’y tabloid na kilala at bantog!

Tabloid nga lang ito na dyaryong maliit

Pero binabasa ng buong daigdig;

Mga nagbabasa’y Tagalog at Ingles

Kaya naglilinang ng puso at isip!

Lubhang dumurunong mga readers nito

Kaya umaangat tayong Pilipino;

Lenguwahe’y malinis kaya kahit sino

Kapag binasa na ay tumatalino!

Anibersaryo nito’y tuwing Marso 17

Kaya ang Pilantik taos ang pagbati;

Sa mga editor at mga kawaksi

Dalangin ng pitak higit pang matangi!

Anibersaryo nito sa t’wing sasapit

Lagi nang may tula rito sa Pilantik;

Hawak na latigo laging nakaligpit

Upang sa paglatay ay hindi masakit!

Ang PSN ngayo’y lubhang naiiba

Sa maraming dyaryong lumitaw sa bansa;

Kung ito’y basahin ng mayama’t dukha

Masasalamin mo’y tapat na adhika!

Ito’y hindi bastos - tunay na matapat

At ito sa bayan ay parang watawat;

Kapag binasa na’t sa baya’y lumantad

Ay katotohanan ang sinasagisag!

Sagisag din ito nitong sambayanan

Na laging kaisa nitong katarungan;

Pati ang gobyerno‚y inaalagaa’t

Sumusunod ito sa Inang Simbahan!