Hinog na saging gamot sa may LBM

ISA sa pinakamasarap at masustansiyang prutas ang saging. Napatunayan ko na bukod sa malaki ay napakasarap ng saging ng mga Bikolano lalo na ’yung bongolan, lakatan at latundan. Super tamis din ang mga saging na senyorita at gloria na nakatanim sa gilid ng paanan ng Mayon volcano sa Albay. Nakatikim na ako ng mga saging galing sa Mayon at napakasarap talaga. Ito ay noong nag-outreach program kami sa Albay nang sumabog ang Mayon Volcano noong katapusan ng dekada ’80.

Ang hinog na saging ay gamot sa mga may loose bowel movement (LBM). Ang taglay nitong potassium ay mahusay na lunas sa dehydration at mga sinisikmura. Gamot din ito sa mga nahihilo at may alta presyon.

Ang balat ng saging ay gamot din sa sugat at pang-alis din ng tagihawat. Ang banana shake ay mainam na pangtanggal ng hang-over. Ang saging na saba ay pansahog sa mga nilulutong ulam gaya ng puchero, mechado, nilagang baka at kare-kare. Siyempre marami ang may gusto ng bananacue at saging con yelo na paborito ni Cora Alonzo ng Valenzuela City.