Kaso ni Taulava hamon sa PDEA

ISA sa pinaka-matindi sa mundo ang Comprehensive Dangerous Drugs Act of 2002. Bitay at multang P500,000 hanggang P10 milyon ang parusa sa possession pa lang ng 50 gramo ng shabu, 500 ng marijuana, o 10 ng opium, cocaine, ecstasy o heroin. Kulong habambuhay at multa naman sa possession ng 10 gramong shabu pero di hihigit sa 50 gramo. Pero kung mahuling nagtutulak ng miski isang gramo lang ng shabu, bitay na.

Nasa batas din ang compulsory drug testing sa mga kumukuha ng driver’s o firearms license, sa pagtrabaho sa gobyerno, at sa mga piling industriya tulad ng professional sports. Anim na buwang compulsory rehabilitation ang igagawad sa nag-positive sa droga sa unang beses. Sa ikalawa o mahigit na positive, kulong na at multa.

Positive sa marijuana ang drug tests nina Professional Basketball Association players Asi Taulava at Dorian Peña. Gitla ang sports fans dahil role models pa naman sila ng kabataan. Pinatawan agad sila ng Games and Amusements Board ng dalawang-larong suspensiyon.

Pero administrative penalty pa lang ang sa GAB. Ayon sa bagong batas, dapat humarap pa rin sina Taulava at Peña sa criminal sanctions. Dumaan dapat sila sa anim na buwang compulsory rehab.

Dito masusubukan ang talas ng tahid ng bagong Philippine Drug Enforcement Agency. Tinatag ang PDEA para ipatupad ang matitinding probisyon ng batas. Tungkulin ng PDEA ipa-rehab ang dalawang player, sikat man o bangko. Pero hindi pa kumikilos ang PDEA. Bakit kaya?

May choice sina Taulava at Peña: magpa-rehab sa government center kung saan gobyerno ang gagasta ng P6,000 kada buwan, o sa private center kung saan sila ang tutustos ng P25,000 kada buwan. Ano man ang piliin nila, kailangan rehab pa rin. Kung hindi, magtataka ang madla at magtatanong: Bakit kung mayaman at sikat, nakakalusot sa batas; pero kung mahirap at maliit, kalaboso agad? Meron nga diyang mahihirap na pamilya, nagsasanla ng kung anu-anong gamit sa bahay, mapa-rehab lang ang kaanak na nalulong sa droga.