Hari ug rayna

Hinaot nga si Jasmine “Daday” Chan nakaila ni Jeane Catherine Napoles. Hinaot dunay nakahunghong niya nga ang iyang gihimo sa 2025 mao say gihimo ni Jeane sa 2013. Hinaot nga dunay nakapakita niya sa pinatuyangan nga posts ni Jeane 12 ka tuig nang nilabay nga walay kalainan sa iyang posts karon.

 Managsama silang nipakita sa mahalon nilang mga butang, sa ilang mga letrato uban sa labing gamhanan ug labing inilang mga personalidad, sa ilang mga biyahe sa ngadto sa nagkalainlaing kanasuran ug sa makabusdik nga kaon ug inom ug kalingawan sa ilang gipasiugdahan nga parties.

          -o0o-

 Managsama sab silang nakaangkon og grabeng pagsaway gikan sa publiko. Nga nakapugos ni Daday, kinsa malipayong nisangyaw sa nagkadaghan niyang likes ug followers, sa paghimong private sa iyang Instagram account ug pagdili sa comments sa iyang Facebook posts. Ug nakapugos sang Jeane pag-deactivate sa iyang social media accounts.

  Pero managsamang uwahi nang ilang pagtago gikan sa publiko. Gi-piyestahan na sa netizens ang screenshots sa ilang posts. Pulos sila gipasanginlan nga bastos nga nipasundayag sa ilang katigayonan taliwala sa grabeng kalisod sa kinabag-an sa katawhan.

          -o0o-

  Maong hinaot nga ang mga ginikanan ni Daday nakaila sab sa mga ginikanan ni Jeane. Ang posts ni Jeane nakatabang sa gobyerno sa paghipos og mga ebidensiya ug pagpasaka og mga kasong tax evasion ug money laundering batok ni Jeane ug sa iyang mga igsuon.

Samang posts nakagiya sa mga sakop sa media sa pagbisto sa ilegal nga katigayonan nga natumpi sa inahan ni Jeane nga si Janet Lim-Napoles nga gipasanginlang utok sa pork barrel scandal.

          -o0o-

Wala pay kasong napasaka batok ni Daday. Pasangil pa lang sa pag-abuso sa gahom ug pagpaburot sa ilang katigayonan ang giluwatan batok sa iyang mga ginikanan nga silang Kongresista Ahong Quirante Chane ug Mayor Cindi King Chan.

Angayng mangaliya silang Ahong, Cindi, ug Daday nga, lahi sa gidangatan nilang Janet ug Jeane, walay mga ebidensiya nga mahipos ang media ug ang mga imbestigador batok nila. Kasuko sa katawhan ang nakapugos sa gobyerno sa pagtinuod sa pagkiha ug pagsilot sa pork barrel queen. Peligro nga samang kasuko sa katawhan karon ang makapabitay sa nagpagawal nga TikTok king.