Kamingaw sa mga Duterte
Kon mag-roll call ang mga Duterte sa ilang alyado nga mga politiko sa Sugbo, peligro nga magmingaw sila. Mahimong way motubag sa ilang tawag. Samtang naa pa nila ang kinatas-an nga popularidad, wa na nila ang labing importante nga kahimanan sa politika --gahom ug puntil.
Mga politiko sa Sugbo way kalainan sa ilang katugbang sa ubang bahin sa Pilipinas: Adto magpunsisok sa tinuod nga mga hawod ug sa nagkontrolar sa politikanhon nga makinarya. Ambot may nakasulti na ba sa mga Duterte nga di na sama kadako ang ilang gahom ug puntil.
* * *
Labing uwahing timaan nga wa nay bilib ang mga lider sa Sugbo sa mga Duterte: Ang lista sa Commission on Elections (Comelec) sa mga distrito nga nakasumiter na og mga pirma sa gisupak sa mga Duterte nga People's Initiative (PI) pag-usab sa 1987 Constitution.
Apil sa labing unang nakasumiter og mga pirma sa labing menos 3% sa ilang rehistradong mga botante ang mga kongresista sa tanang distrito sa Sugbo: Duha sa Cebu City, pito sa Cebu Province, tagsa sa Lapu-Lapu City ug Mandaue City, ug Cebu-based party-list groups.
* * *
Kon wa pang kabantay ang mga Duterte, ikaduha na ning higayon nga gibukubuko sila sa mga kongresista sa Sugbo nga sipsip kaayo niadto sa administrasyon ni kanhi presidente Rodrigo Duterte.
Nipirma sab sila niadtong Oktubre sa niaging tuig og pormal nga deklarasyon sa ilang hingpit nga suporta sa “daghang mahimo” sa “tarung nga liderato” ni House Speaker Martin Romualdez atubangan sa mga pagsaway ug balikas sa kanhi presidente.
* * *
Way kukaikog nga nitalikod sa mga Duterte mao ang Sugbuanon nga si Tourism Secretary Christina Frasco, ang tigpamaba sa kampanya ni Bise Presidente Sara Duterte Carpio sa eleksyon sa 2022. Gawas nga tak-om si Christina sa pagtangtang sa confidential funds ni Carpio, iyang bana nga si Deputy Speaker Duke Frasco maoy nangu sa mga kongresista sa a Visayas pag-amen ni Romualdez.
Igo lang hinuong nisunod ang magtiayong Frasco sa postura sa Pamilyang Garcia sa Sugbo. Nga nidali-dali og basura ni Jejomar Binay aron pagkabayo sa nisulbong nang kandidatura ni Duterte niadtong 2016. Karon paspas sang niisnab sa mga Duterte para ni Romualdez ug Presidente Ferdinand Marcos Jr.
- Latest
