Aron di mausik ang CIF
Bisan sa iyang ?4.5 bilyones nga Confidential ug Intelligence Funds (CIF) karong tuiga, si Presidente Ferdinand Marcos Jr. wa pa makahingan og bisan usa ka sakop sa rice cartel, onion cartel, ug sugar cartel nga iyang gipasanginlan nga maoy nagmaniobra sa suplay ug presyo sa mga produkto sa agrikultura.
Imbes ipasabot unsay gigastohan sa iyang CIF, nga gusto niyang pun-an og samang kantidad sunod tuig, si Marcos nangayo na hinuon sa tabang sa publiko sa paggukod sa smugglers ug hoarders sa nimahal ug nagnihit nga mga produkto sa pagkaon.
***
Kinahanglan pa bang pun-an sa Kongreso ang iyang CIF, nga mas dako pa kay sa gigahin sa tinuod nga security agencies, una matuman ang katuyoan ini sa pagbadlong sa mga hulga sa nasudnong seguridad ug ekonomiya?
Sa di pa ta kapasanginlan nga kontra sa kalinaw ug sa nasud, bahala na kon di palilion unsay iyang gigastohan sa ?12.5 milyones kada adlaw, mangahas mi pagsugyot og mga paagi unsaon nga ang CIF magasto g’yud pagpangespiya ug paghipos og kasayuran batok sa tinuod nga national security threats ug economic saboteurs.
***
Aron di mahurot ang CIF sa sekretong pagsusi sa sunod nga mga lumba nga mahimong abibahan, human nakontrobersiyal ang iyang pagtan-aw sa duha ka sunudsunod nga F1 Grand Prix sa Singapore, niang nahibiling mga lumba sa Formula 1 Grand Prix karong tuiga:
• United States Grand Prix sa Austin, Texas karong Oktubre 22;
• Mexico City Grand Prix sa Mexico City karong Oktubre 29;
• Sao Paulo Grand Prix sa Brazil karong Nobyembre 5;
• Las Vegas Grand Prix sa Nevada karong 18; ug
• Abu Dhabi Grand Prix sa Yas Island on karong Nobyembre 26.
***
Aron di mausik ang buhis sa katawhan pagsubay sa lain niyang paborito, niang schedule sa mga konsiyerto ni Eric Clapton sunod tuig (pulos sa United Kingdom): Mayo 9 sa Newcastle upon Tyne, Mayo 11 sa Liverpool, Mayo 13 sa Birmingham, Mayo 18 sa Manchester, ug Mayo 20, 21, 23, ug 24 sa Royal Albert Hall sa London.
Gipasalig ni Clapton nga iyang kantahon ang tanang paborito sa iyang fans nga naglakip sa “I Shot the Sheriff”, “Tears in Heaven”, “Layla”, “Wonderful Tonight” ug “Cocaine”.
- Latest
