Pagbuot rang Rama ang matuman

Kon unsa kalapad ang protesta sa mga Sugbuanon sa iyang pag-insistir nga sa South Road Properties (SRP) himuon ang Sinulog 2023 mao sab kasipa ang pakpak nga nisugat sa pagsupak ni Cebu City Mayor Mike Rama sa signal shutdown sa mobile phones karong Sabado (Enero 14) ug Domingo (Enero 15).

Labi na nga dako ang kahigayonan nga ang gusto ni Rama maoy matuman: SRP ang venue bisan kon niapil na og kuwestiyon si Cebu Governor Gwen Garcia; ug way signal shutdown bisan giaprobahan na sa National Telecommunications Commission (NTC).

* * *

Napamatud-an ni Rama nga siya ang tinuod nga hawod sa Sinulog. Bisan sa ilang kaugalingon nga mga panagana sa SRP, ang ubang mga opisyal sa City Hall ug Sinulog Foundation Inc. nipaluyo sa iyang plano ug nitabang pagpahiyos sa higanteng risgo nga ilang gipangulitawhan.

Si Garcia, nga gihulagway nga kinalig-onan sa iyang liderato sa Sugbo tungod sa suporta sa Malacañang ug sa hapit tanang politiko sa mga syudad ug kalungsoran, way mahimo paglubag sa hukom ni Rama: Mapugos og sayaw sa Sinulog sa SRP bisan sa panagana sa trapiko ug seguridad.

* * *

Bisan ang kapolisan kurog ni Rama. Gisunod sa bag-ong hepe sa Police Regional Office sa Central Visayas ang naandan sa nangaging mga liderato sa pagpawong sa cell sites sa Metro Cebu bisan way klarong hulga sa seguridad, ni ebidensiya sa kamapuslanon.

Bisan nakakuha na sa pagtugot sa NTC, si Police Brigadier General Jerry Bearis nikumpisal nga mag-agad silang Rama. Kinsa nipadayag og kahimangod nga wa siya konsultaha sa signal shutdown.

* * *

Nakatabang pagbayaw sa liderato ni Rama ang kapahoy ni Bearis ug sa NTC. Nagkauyon sila sa signal shutdown, nga makahasol sa minilyon ka mga molupyo sa Sugbo ug kasilinganang mga isla, bisan ang way plano pagtan-aw sa Sinulog, sa way pakigsulti sa mga tigpasiugda.

Bisan ang kahimtang sa panahon niabag ni Rama. Wa matinuod ang gipasidaan sa PAGASA nga kusog nga uwan sugod niadtong Lunes. Ambot nalipat ba lang ta sa katabian ug bisyo sa pagkanta-kanta ni Rama, o hanig lang ning tanan sa kinadak-an niyang kauwawan, manguros na lang ta nga ang mga Sugbuanon di mameligro ug ang Sugbo di mahitumpawak sa kaalaotan.