Pakauwaw sa Senado
Usa sa pildero sa linigwatay sa mga puwersa sa Malacañang, nga niresulta sa pagkataktak ni Victor Rodriguez isip executive secretary human lang sa 79 ka adlaw sa puwesto, mao ang kaligdong sa Senado. Daghang salamat sa sipsip nga liderato ni Senate President Migz Zubiri.
Wa pa gani kasugod ang imbestigasyon sa Senate Blue Ribbon Committee sa krisis sa asukar, nideklarar na siyang daan nga way krisis. Kay artipisyal ang kanihit sa suplay. Gihulagway niya nga dagat sa asukar ang sud sa mga bodega nga gironda sa Bureau of Customs (BOC).
* * *
Wa pa gani mahumang imbestigasyon sa komitiba, gi-absuwelto nang Zubiri si Rodriguez. Nga way labot sa nabulilyaso nga importasyon sa 350,000 metric tons nga asukar. Kay si Rodriguez ang nipahibawo ni Presidente Ferdinand Marcos Jr. parte sa Sugar Order No. 4 nga napirmahan na bisan way pananghid sa Malacañang.
Tuod man, ang mayoriya sa mga sakop sa komitiba, daghang salamat sa taphawng liderato ni Senador Francis Tolentino, nisalikway sa mga ebidensiya batok ni Rodriguez ug sa presidente. Nalimtan gani sa ilang findings ang kaseryuso sa krisis sa asukar.
* * *
Mas hinog ang liderato sa Senate Minority Bloc. Gitumbok nila ang kagrabe sa krisis sa asukar sukwahi sa pangangkon nilang Zubiri ug sa presidente. Gituohan sab nila ang mga pasangil nga si Rodriguez ang responsable sa pagtago sa importante ug dinaliang kasayuran maong wa magkasinabtanay sa importasyon sa asukar.
Duha ray sakop sa minoriya --silang Senate Minority Leader Koko Pimentel ug Senador Risa Hontiveros-- pero mas bug-at ang ilang tingog. Kay gipasikad sa nagbuntaog nga mga ebidensiya nga gilingiwan sa mayoriya.
* * *
Labing klarong ebidensiya nga sakto silang Pimentel ug Hontiveros mao ang pagkataktak ni Rodriguez. Hasta ang presidente, bisan sa ulug-ulog nilang Zubiri, Tolentino, ug kaubanan, wa nang kadupa sa labing sinaligan niyang opisyal.
Mangayo ba og pasaylo si Zubiri sa mga tag-iya sa mga bodega nga iyang gipasanginlang smugglers ug hoarders human nikumpisal ang BOC nga pulos lehitimo ang ilang mga dokumento? Mangayo ba og pasaylo ang mga senador sa pagtabon imbes pagsulbad sa krisis sa asukar? Hinaot nga maikog sa kaligdong sa ilang institusyon. Nga gipangulohan niadto sa mga higanteng nibatok sa pangurakot ug diktadura.
- Latest
