Si Diokno ang tinuod nga nagyaya
Tugoting morehistro ko og pagsupak sa plano ni Finance Secretary Benjamin Diokno nga ang mga duna ray National ID card ang hatagan og ayuda. Motingog ko kay si Diokno ang pangu sa economic managers ni Presidente Ferdinand Marcos Jr. Maong dako ang kahigayonan nga ang iyang tambag maoy matuman.
Para nako pulos kuwestiyonable ang gipahibawo ni Diokno nga duha ka sukaranan sa iyang plano: Una, nga usik-usik sa pundo sa gobyerno ang padayong paghatag og ayuda sa pandemya; ug ikaduha, aron madasig ang katawhan sa pagkuha og National ID cards.
***
Di usik-usik ang padayon ang paghatag og ayuda sa katawhan nga hangtod karon, dul-an tulo ka tuig na human sa pag-ulbo sa pandemya, padayong naapiki kay wa pa mabalik ang ilang panginabuhi atubangan sa nagsulbong nga presyo sa inadlaw nilang mga panginahanglan.
Ang nausik nga mga ayuda mao ang gipaagi sa mga politiko. Kay ila rang mga dumadapig ang nahatagan. Nalaktawan ang labing nagkinahanglan. Nga wa nila mailhi. O wa mopabantang og suporta sa ilang kampanya. Ang sistema sa pag-apud-apod sa ayuda maoy busluton. Angay nga himuong mas makiangayon.
***
Nahikawan sab sa ayuda ang labing tabanganan tungod sa buslot sa burukrasya. Nag-usab-usab ang mga lagda pagpanghatag sa educational assistance sa Department of Social Welfare and Development (DSWD):
- Sa sinugdanan, DSWD ray manghatag kay malawgaw kon paapilon ang lokal nga mga opisyal;
- Dihang nagdasok, nagpatabang ang DSWD sa local government units (LGUs);
- Giawhag ang mga estudyante pagparehistro online, dihang nangreklamo ang way smartphones gitugotan ang walk-in, dihang nagkaguliyang gibalik ang QR code ug online registration; dayon
- Gisuspenso ang online registration kay wa maato ang gidaghanon sa mga aplikante.
***
Kinabag-an sa nagkinahanglan og ayuda way National ID cards. Maong samot silang mahikawan sa hinabang. Di sayop sa katawhan ang kalangay sa pag-apud-apod sa National IDs. Kapin sa tuig na silang nakapa-biometrics pero wa pang kadawat sa IDs.
Gibasol sa kalangay ang Philippine Statistics Authority ug Philippine Postal Corp. Pero nasakpan sa Commission on Audit nga ang tinuod nga sad-an maong nagyaya nga tig-imprinta sa cards. Nga gikontrata sa Bangko Sentral ng Pilipinas ubos sa kanhi tagduma. Nga mao si, nakatag-an ka, Diokno.
- Latest
