Si Padre Paking ug ang arancel
Nagpabiling tak-om ang Artsidyosesis sa Sugbo, ang kinadak-an sa Pilipinas, sa lab-as nga awhag sa Catholic Bishops Conference of the Philippines (CBCP) karong tuiga sa pagpapas sa buhis sa mga serbisyo sa simbahan.
Ang awhag sa CBCP nidason sa nahaunang baruganan sa mga obispo sa Pilipinas sa 1992 pagsubli ug pag-usab sa karaang sistema sa arancel. Gisundan sa pagpapas sa arancel sa Artsidyosesis sa Lingayen-Dagupan niadtong 2015 ug sa dyosesis sa Balanga niadtong 2019. Human kusganong nanalipod sa arancel, ang kadagkoan sa Artsidyosesis sa Sugbo nagpalingug-lingog na lang sa kontrobersiya.
***
Kinaham nga argumento sa kaparian sa Sugbo nga akong nahinabi pabor sa arancel: Mao ra ni bugtong paagi nga makalahutay ang mga parokya sa inadlawng gastohan sa mga pari ug mga kawani labi na taliwa sa pandemya nga gihigpitan ang pagtambong sa mga misa; nipasidaan pa gani ang pipila nila nga may mga parokya nga mabangkarota kon wa nay arancel.
Pero wa silang kapasabot nganong wa ma-pordoy ang mga parokya sa Lingayen-Dagupan ug Balanga, Bataan. Gani, mosunod ang Artsidyosesis sa Manila sa pagpapas sa arancel sugod karong Abril 14.
***
Gipaabot nga mas daghan pang artsidyosesis ug dyosesis ang mosanong sa pagdasig ni Pope Francis nga hunungon na ang pagtakda og presyo sa mga serbisyo sa simbahan.
Giawhag sa Santo Papa ang kaparian nga angayng moserbisyo sa way pagpaningil og bayad uban ang hingpit nga pagsalig nga ang mga parokyano di mohikaw sa naandan nilang pagtabang sa inadlaw nga mga panginahanglan sa mga simbahan.
***
Tingali makapapas sa kahadlok nilang Cebu Archbishop Jose Palma ug kaubanan nga magpakilimos sila kon papason ang arancel ang sugilanon sa ilang kaubang pari nga labing una nga nipapas sa arancel sa iyang giduma nga parokya sa kasadpang Sugbo.
Pila ka dekada nang nilabay, ang batan-ong Padre Francisco “Paking” Silva maoy gipaduma sa parokya sa Moalboal. Labing una niyang pahibawo sa mga parokyano nga wa nay bayad ang mga misa sa kasal, bunyag, ug lubong ug ubang serbisyo. Human sa pila ka buwan nga wa nay arancel, nilambo ang parokya. Bisan sa talagsaong kalamposan ni Padre Paking dakong kalibogan nga way bisan usa ka pari nga nisunod sa iyang gihimo.
- Latest
