Unsaon pagbakwi ang nahinaykan
Kon tinuod ang pasangil ni Presidente Rodrigo Duterte nga mga polis ang nagpatay dinhi sa Dakbayan sa Sugbo ni Mayor David Navarro sa Clarin, Misamis Occidental, niadtong Biyernes, haskang bagtoka kaha sa panaguto sa mga hingtungdan.
Kay ang ilang gituohan nga gikalagotan sa presidente, higala man diay; ang ilang gituohan nga gigukod sa pamunoan, alyado man diay sa politika. Tingali nagtuo nga ang ilang gihimo makapahimuot sa presidente. Apan gipa-imbestigar na man hinuon sila sa National Bureau of Investigation (NBI). Nga sa pipila ka higayon wa maikog sa pagkiha nila.
***
Usa sa mga pagtulon-an ining hitaboa mao nga ang listahan ni Presidente Duterte sa mga politiko nga gipasanginlan nga nanalipod sa ilegal nga drugas, bisan unsa pa kabag-o, sama sa listahan dayong piniliay sa Mayo karong tuiga nga naglakip ni Navarro, di na diay kasaligan.
Kinahanglang himoan una og pakisusi kinsa sa mga nalista ang nilampos sa pakigkita sa presidente. Mas lisod ang pagtugkad sa hunahuna sa presidente kon naglagot pa ba o nakumbinser na nga mas mapuslanon ang politikanhong alyansa kay sa pagpadayon sa mga pasangil nga way ebidensiya.
***
Karong nipahibawo na si Presidente Duterte nga iya diay’ng dumadapig ug di kaatbang si Navarro, moinsistir ba gihapon ang kadagkoan sa Cebu City Police Office (CCPO) ug Police Regional Office (PRO) sa Central Visayas nga protektor siya sa ilegal nga drugas?
Mamasangil ba gihapon ang National Capital Region Police Office nga gipangulohan ni Police Brigadier General Debold Sinas nga si Navarro ang pangu sa Alferez Robbery Group nga gitumbok nga maoy nanulis sa shopping mall sa Mandaue City?
***
Gawas nga mohunong na pagtulisok sa namatay’ng mayor, ang kadagkoan sa CCPO ug PRO-7 mo-distansiya na sa pagbanhig ni Navarro. Mahimong sugdan nila pinaagi sa pagrelibo sa mga polis nga wa mosukol, o ba kaha nitabang g’yud, sa armadong mga tawo.
Sa kataposang higayon nga gikiha sa NBI ang mga polis sa CCPO nga gipasanginlang nakapatay sa 4 anyos nga si Skyler Abatayo sa Bato, Ermita, girelibohan ang direktor sa NBI-7. Maong makapaabot ta nga hasta ang NBI, sama sa mga polis, magsusi una asa sila mopahimutang sa di pa mahinayak. [email protected]
- Latest
