Haw-ang sa habagat ug amihan
Unahon nato ang mosunod nga maayong mga balita gikan sa Philippine Atmospheric, Geophysical and Astronomical Services Administration (PAGASA) mahitungod sa kahimtang sa panahon sa Sugbo, Bohol, Negros Oriental, Siquijor, ug silingang mga lalawigan:
• Nawa na ang habagat ug busa wa nay hulga sa pagdagko sa bawod sa kadagatan ug wa na say nihuyop sa dugang aso ug abo sa lapad nga sunog sa kalasangan sa Indonesia paingon dinhi sa ato; ug
• Mopuli na ang bugnaw nga hanging amihan nga moduso sa bisan unsa nga nahibilin nga haze palayo sa Sugbo ug Central Visayas.
* * *
Apan isunod dayon nato ang di maayong mga balita gikan sa PAGASA:
• Sa haw-ang nga gibiyaan sa habagat ug sa dayong puli sa amihan nipis ang mga panganod ug busa gamay ang kahigayonan sa uwan ug atong mahiagoman ang kinatibuk-an nga kainit sa adlaw; mao nga
• Sa mosunod nga mga adlaw (mahimo ganing molungtad hangtod sa unang semana sa Oktubre) labihang alimuota sa Sugbo ug Central Visayas nga ang heat index (ang aktuwal nga kainit nga mabatyagan sa atong lawas) mahimong mosulbong ngadto sa 40 degrees Celsius.
* * *
Labing dinaliang epekto sa pagkagiw sa habagat ang pagtin-aw sa atong palibot. Human sa baga nga haze sa niaging mga semana, masihag nang asul nga langit ug maklaro na gikan sa among bukid sa Consolacion ang matahom nga bayhon sa Marcelo Fernan Bridge, ang nanuybo nga mga istruktura sa Busay ug bisan ang lagyong kabukiran sa Balamban.
Kutob ra hinuon ta sa gitawag sa Environmental Management Bureau nga visual monitoring (sa Binisaya pa, mata-mata) kay nihunong sila paghatag og sukod sa kalidad sa hangin ginamit ang nihit ug depektuso nilang kahimanan.
* * *
Apan ang mas makadaot nga epekto sa kainit, nga kon kumpiyansahan mahimong mosangpot sa kamatayon tungod sa heat stroke ug dehydration, mao ang kakuwang sa uwan. Wa na man untay El Niño apan wa moabot ang gipangagpas nga mas abundang uwan sa Septiyembre.
Mobalik ang kanihit sa agas sa atong mga gripo, padayong mopasobra og suyop og groundwater ang pribadong water suppliers ug mas moisog ang panglawgaw sa mga politiko nga nagpanilap nga mobanos pagduma sa Metro Cebu Water District.
- Latest
