Di mangiyugpos lang
Tungod sa kasong gipasaka ni Atty. Karen Quinanola-Gonzales batok sa mga tagduma sa Colegio dela Inmaculada Concepcion (CIC) Mandaue, nga gipasanginlang nagpabaya sa kaso sa iyang anak nga giingong nabiktima sa bullying dul-an sa duha ka tuig nang nilabay, nitiyabaw ang daghang mga ginikanan nga nahiagom sa samang kasinatian sa CIC Mandaue ug ubang eskuylahan apan wa mahibawo unsay buhaton.
Ang pipila nga nangisog pagreklamo wa matagbaw sa mga lakang sa eskuylahan. Gawas nga wa masiloti ang mga tinun-an nga nanghasi, ang ila pa hinuong mga anak ang gigukod ug giapiki.
* * *
May inahan nga tigpaminaw nga nisumbong nga karon lang bag-o siya nahibawo sa nahitabo sa iyang anak duha ka tuig ang nilabay. Gihulga ang iyang anak (nga Grade 3 niadtong higayona) sa tinun-an sa Grade 5 nga sukmagon sa nawong kon di mohatag og P200.
Maayo na lang kay nadunggan sa madre nga tagduma sa eskuylahan ug gisuspenso ang nangilkil nga tinun-an og duha ka semana. Karon pa nitug-an ang anak niya kay nibalhin na og eskuylahan ang nangilkil. Nahiubos ang inahan nganong gitago sa eskuylahan ang panghitabo gikan niya.
* * *
Mga ginikanan nga may mga anak sa CIC Mandaue nipahibawo nga dihang nabiktima sab sa bullying ang ilang mga bata, giawhag dayon sila sa mga tagduma sa eskuylahan nga husayon ang problema sud lang sa institusyon.
Nangagpas sila nga wa matarung pag-atiman ang kaso sa anak ni Atty. Gonzales kay tingali og giisip sa mga madre nga mas dako nga atraso ang ilang pagpa-ospital sa bata ug pagpa-blotter sa insidente sa kapolisan.
* * *
Sa iyang bahin, gipasabot ni Atty. Gonzales sa Arangkada sa DYAB Abante Pa, Bisaya! nga gihatagan niya ang mga tagduma sa CIC Mandaue sa tanang kahigayonan pagsusi sa pagkabun-og sa iyang anak ug pag-disiplina sa mga sad-an.
Nipasaka siya og pormal nga reklamo sa eskuylahan. Dihang way nahitabo, nisang-at og kasong administratiba sa Department of Education (DepEd) sa Mandaue. Dihang wa gihapoy nahitabo ug human sa usa ka tuig ug lima ka buwan nga pinaabot, nahukman nilang Atty. Gonzales ug sa iyang bana nga mahiagom og mas dakong inhustisya ang ilang anak kon di nila ipasaka ang kasong danyos.
- Latest
