Nganong mahal ang bugas
Gipasalig ni Regional Director Fernando Nuñez sa National Food Authority sa Central Visayas nga wa siyay nakita nga timaan nga dunay rice cartel nga nagmaniobra sa suplay ug presyo dinhi sa Sugbo ug sa rehiyon. Matod ni Nuñez way ebidensiya nga nagkonsabo ang mga negosyante og bugas humay aron pagpaburot sa ilang ginansiya pinaagi sa pagmugna og artipisyal nga kanihit sa bugas humay.
Kapin pa sa buwan nga nibanos si Nuñez pagduma sa NFA-7, una niyang destinasyon gawas sa Mindanao human sa 36 ka tuig nang pagduma sa ahensiya.
***
Si Nuñez, nga lumad nga taga Tacurong City sa Sultan Kudarat nipasabot, sa Arangkada sa dyAB Abante Pa, Bisaya! nganong nagpabilin nga taas ang presyo sa commercial rice bisan sa pag-abot na sa mas baratong NFA rice:
•Uwahi na kaayong naaprobahan sa NFA Council ang importasyon sa bugas humay di lang sa NFA kon dili hasta sa pribadong mga negosyante; maong
•Inay nga ang mas baratong presyo sa ting-ani sa niaging tuig ug sayo ning tuiga, ang mas taas nang presyo ang ilang naabtan sa tingnihit nga mga buwan sa tungatunga ‘ning tuiga.
***
Nitataw si Nuñez nga may konsuylo sa niulbong krisis sa bugas humay: Nidako ang kita sa mga mag-uuma tungod sa pagsulbong sa presyo sa mga tipasi nga niabot na og P29 matag kilo sa pipila ka bahin sa nasud.
Mao ni hinungdan, segun ni Nuñez, nga way nilingi sa P18 matag kilo nga support price sa NFA, nabasiyo ang mga bodega sa NFA ug nisamot pagmahal ang commercial rice.
***
Niduaw diay sa Sugbo si NFA Administrator Jason Aquino (nga gianggaan nilang Nuñez ug ubang kadagkoan nga “AJA”) pila ka adlaw sa wa pa ipahibawo ni Presidente Rodrigo Duterte ang iyang pagbiya sa katungdanan. Siyay niduma sa pag-inugurar sa P33 milyones nga bodega sa NFA sa Cebu International Port nga gipasalig ni Nuñez nga makasukol og bagyong sama kakusog ni Yolanda og linog nga mas kusog pa sa nitay-og sa Sugbo ug Bohol niadtong 2013.
Bisan unsa pay hinungdan, ang pagkabasiyo sa tanang bodega sa NFA sa labing unang higayon sa 46 ka tuig niyang kasaysayan maoy nangalisbong kabilin ni Aquino.
- Latest
