Tulo nasikop sa buy-bust

CEBU, Philippines — Gikatakdang  ibalhog sa Lapu-Lapu  City  Jail nga nahimutang sa Sitio  Soong,  Barangay Mactan ang 19- anyos nga nadakpan sa buy-bust operation nga gipahigayon sa Sitio  Atabay,  Barangay Agus. Ang dinakpan mao si Ian Dador Sagarino, nagpuyo sa nahisgutang lugar, hingpit nang gipasakaan og kaso sa korte gumikan sa kalapasan sa Republic  Act 9165  o Comprehensive  Dangerous Drug Act of 2002.

Matud ni Police Chief  Inspector Juan Lodovice  Capacio nga maoy hepe sa Presinto 4 sa Lapu-Lapu City Police Office, nga ang suspek, ilang nasakmitan og siyam ka gagmay’ng pakete sa gituohang shabu atol sa naasoy nga operasyon.

Sa laing bahin, nasakmit sa mga sakop sa Philippine Drug Enforcement Agency (PDEA-7) nga gipangulohan ni Regional Director Emerson Magarte, ang P275 mil nga balor sa gituohang shabu atol sa buy-bust operation sa may Sitio City Central, Barrio Luz, Dakbayan sa Sugbo niadtong Biyernes sa hapon.

Ilang nasikop sila si Erniel Rulona, 38-anyos ug Ana Lucia Pabilando alyas Ana, 48-anyos.

Nakuha gikan sa mga suspek ang siyam ka pakete sa gidudahang shabu nga moabot sa 55 ka gramos nga gibana-banang aduna'y market value nga P275 mil. Mag-atubang sab sila og tukmang kaso subay sa RA 9165. - Leanne Mae Binag (BANAT NEWS)