Unom ka kalibogan
Ambot kon nagtinguha ba lang sa pagpahiyos sa hulga sa mga sakop sa Abu Sayyaf Group (ASG) sa Bohol ug Sugbo, o nabalaka nga ma-alarma ang katawhan kon tug-anan sa tanang kasayuran, o masaligon lang nga magyangu-yango ang katawhan bisan unsay ilang sulti ug pasalig, nagkasumpaki ug busa lisod tuohan ang pipila sa mga pangangkon sa militar ug kapolisan sa nangaging mga adlaw.
Niang kadudahan nilang istorya mahitungod ni Joselito Melloria, sa gidudahang presensiya sa armadong mga tawo sa Olango ug sa nahaunang hugot nilang panghimakak nga niabot nang ASG sa Central Visayas:
***
Nag-usab-usab ang ilang paghulagway sa Bol-anon nga si Melloria:
•Mao ni unang misyon ni Melloria nga kon nilampos pa makapahimo unta niyang hingpit nga sakop sa ASG, apan dihang napatay na gihulagway na si Melloria nga maoy bag-ong pangu sa ASG sa Bohol ug nagda na sa ngan nga Abu Alih; ug
•Kon pagpalit og pan sa Tubigon ang tuyo nilang Melloria pagsakay og habal-habal nganong wa man siyang katultol sa mas duol nga bakery sa Clarin nga naka-eskuyla man unta siya didto, ug kon pag-ikyas ang tinuod nga tumong nganong wa man pugsa paghatod nila sa Tubigon ang drayber nga nahadlok nang daan sa ilang baho?
***
Kahibudngan sang ilang istorya sa giingong mga armado sa Olango:
•Gihunong nang pagpangita sa mga armado kay sayop diay ang kasayuran gikan sa babayeng molupyo, apan nigahin g'yud og duha ka adlaw ug usa ka gabii pagsudlay sa lapad nga katunggan sa Olango; ug
•Kon tinuod nga way mga armado, nga segun sa barangay kapitan sa San Vicente posibleng didto na sukad pa sa Huwebes Santo, unsa man diay tong mga buto nga nadunggan sa kapolisan sa Talima niadtong Huwebes sa hapon?
***
Lisod hinuong hitupngan ang ilang pagkisikisi sa US travel advisory batok sa mga terorista sa Bohol ug Sugbo:
•Nagpa-goryo-goryo ba lang sa pagpanghimakak sa presensiya sa ASG o sila ra say tinubdan sa kasayuran sa US apan naunhan lang sa pagpasidaan sa katawhan? ug
•Kon nahibawo nang daan sa pag-abot sa ASG, nganong nakalusot mang mga bandido ug nakabuwad gani sa ilang mga armas ug mga bala sa Ylaya, Napo, Inabanga?
- Latest
