Kalibog sa mga walhon
Klarong naglibog ang mga walhon sa kandidatura ug bisan karon sa nag-ung-ong nga kadaogan ni Davao City Mayor Rodrigo Duterte:
•Wa silang kahuwat sa iyang paglangay paglusad sa kandidatura, inay sa Oktubre nga maoy deadline sa Commission on Elections, niadtong Disyembre na siya nideklarar; maong
•Nahinayak si Kongresista Neri Colmenares sa pagdagan pagka senador ubos sa grupo nilang Senador Grace Poe ug Senador Chiz Escudero;
•Naapil sila og kakutaw sa di kasarangan nga mga balikas, panginsulto ug ubang mga pamahayag ni Duterte atol sa kampanya; ug
•Ang militanteng mga pundok nga di kahutdan og istorya wa dayon kasumpay sa pagtanyag og upat ka lingkoranan sa gabinete alang nila.
* * *
Dihang nisugod na sila og panaway sa pasiunang ekonomikanhong mga plano sa pamunoang Duterte, nasagpaan ang walhong mga pundok sa tukma nga mga pahinumdom sa nagkataas nga listahan sa ilang sayop nga mga hukom sa nangaging mga piniliay sa nasud:
•Ni-boykot sila sa snap presidential election sa 1986 inay motabang sa pagpukan sa diktadura ni Ferdinand Marcos maong wa kabuylo sa pagduso sa ilang gipakigbisogang kausaban sa pagbanos ni anhing Presidente Cory Aquino sa Malakanyang; ug
•Gipili nila ang mas gamhanan og makinarya nga si Manny Villar batok ni Noynoy Aquino sa piniliayng presidensiyal sa 2010 bisan nagkauban sila sa entablado sa anak sa diktador maong nawani na sab sila sa niaging unom ka tuig.
* * *
Dihang nangomedya si Duterte nga nasuko siya sa mga piniriso nga nanglugos kay siya unta ang angay’ng unang makapahimus sa guwapa nga langyaw’ng misyonera, ang militanteng Gabriela ang usa sa labing unang nisaway sa pagbinastos ni Duterte. Apan nagdumili pagpangayo og pasaylo si Duterte ug nihagit sa Gabriela pagpangampanya batok niya.
Sa laing pasundayag sa grabeng kalibog, gitakli sa Gabriela ang ilang pagtulisok ngadto ni Presidente Noynoy Aquino. Kansang pamunoan mao nay ilang gipasanginlan nga napakyas pagpanalipod sa interes sa kababayen-an mao nga hangtod karon padayong gibugal-bugalan.
* * *
Maong mapasaylo ang mga walhon nga naamang sud sa pila ka adlaw sa pagtanyag ni Duterte nila sa Department of Agrarian Reform, Department of Environment and Natural Resources, Department of Social Welfare and Development ug Department of Labor and Employment.
Mas una pang nakatubag silang Chairman Jose Ma. Sison sa Communist Party of the Philippines ug Luis Jalandoni sa National Democratic Front. Kinsa nidalidali pagpasabot nga ang ilang mga irekomendar di kinahanglan nga mga komunista apan susama og progresibong baruganan. Bisan sa talagsaon nga kasuod nilang Sison ug Duterte, klarong di pa andam ang walhon nga mga pundok nga moggakos sa bag-o nilang papel isip mahinungdanon nga kabahin ug di na higpit nga kaatbang sa nasudnong pamunoan.
- Latest
