Way lukso sa dugo

Di si Prince Niño Celadiña ang unang nakit-an ni Melissa Londres sa iyang pagsud sa labor room sa Vicente Sotto Memorial Medical Center  sa udtong tutok niadtong Lunes. Una niyang giduol ang tapad nga pasyente nga nagkinahanglan og urinalysis. Gida ni Melissa, nga nagpaka aron ingnon nga nurse, ang papel sa pasyente ngadto sa laboratoryo.

Apan may kuwang maong nibalik ug iyang nakit-an ang kahigayonan pagkawat sa duha pa ka adlaw nga si Prince.

Samtang nalinga si Jonathan, ang amahan sa bata, pagtubag sa PhilHealth forms, niingon si Londres nga iyang giingnan ang inahan nga si Jayvee nga mangadto sila sa laboratoryo aron kabakunahan si Prince batok sa dengue.

* * *

Kay nakit-an mang niatiman sa tapad nilang pasyente, gitugotan ni Jayvee si Londres pagkugos ni Prince. Wa siya pasudla sa laboratoryo. Nabalaka na lang si Jayvee dihang wa mabalik si Londres ug ang bata human sa 15 ka gutlo.

Niadtong higayona, nakagawas na si Londres agi sa luyo sa VSMMC. Way guwardiya nga nipugong niya ni nangutana nganong nagkugos  siya og bata. Nitug-an si Londres sa Arangkada sa DYAB Abante Pa, Bisaya! nga nagbutang siya og face mask pagsud sa ospital aron di mailhan. Nakit-an siya sa CCTV nga nitangtang sa mask dayong gawas sa VSMMC kay kumpiyansa na nga way nagduda niya.

* * *

Dali rang nakapara og taxi si Londres sa paggawas sa gate sa VSMMC sa Osmeña Blvd. Nagpahatod siya og balik sa shopping mall sa Colon. Diin nisud na sab sa fitting room aron paghubo sa gisapaw nga puti nga uniporme. Gilabay niya ang uniporme sa basurahan sa mall ug nisakay og laing taxi para Lahug.

Nisud siya og pribadong klinika aron pagparehistro sa bata. Apan gipabalik siya pagka sunod adlaw. Alas-3 sa hapon siyang nakabalik sa bay sa Sitio Fatima nga giabangan sa iyang hinigugmang si Philip Winfred Almeria, kinsa iyang naabtan nga mao pay pagmata.

* * *

Sa iyang bahin, si Almeria nitug-an nga iyang gibuwagan si Londres niadtong Abril kay wa na ganahi sa labihang kaabubhoan ug kamadudahon. Apan bisan giseradoan nang boarding house, nikatkat si Londres sa bintana.

Gitugotan niyang makasud si Londres tungod sa kaluoy apan buwag sila og higdaanan. Niangkon si Almeria nga iyang nasagpaan si Londres dihang namugos nga maghilawas sila.

Dihang gipahibawo ni Londres nga nagsabak siya, nisugyot si Almeria nga ipakuha ang bata kay di pa andam ang ilang panalapi. Apan dihang nakit-an ni Almeria si Prince, bisan wa kabatyag og lukso sa dugo, giisip niyang responsibilidad ang pag-atiman sa bata ug ni Londres. Day off si Almeria niadtong Martes maong nitabang og pamalit og mga panginahanglan sa bata. Sa wa pa matultoli sa mga polis.