Lihoka dayon ni uy!

Angay na g’yud tingali nga molihok si Acting Regional Director Arnel Tancinco sa Land Transportation Office aron pangdakpon ang mga motorista nga dili motuman sa lagda sa pagmaneho ug ang uban magmaneho’g sakyanan nga pundir ang suga sa gabii.

Kinahanglan nga ang LTO mohunong na sa ilang pagkiyugpos ug paghinan-aw lang sa mga dakponon nga mga drayber. Ambot kun unsa kaha’y bation ni Director Tancinco nga makasugat og sakyanan nga pundir ang suga?

Isip labing dako’ng opisyal sa LTO dinhi sa Central Visayas, anaa nakasangon sa abaga ni Tancinco ang pagtudlo’g leksyon sa mga abusado nga draybers. Kuyaw kaayo kini’ng mga sakyanan nga pundir ang suga dapit sa driver’s side kay lagmit kini makadisgrasya.

Ang problema gud kay ang labaw’ng opisyal sa LTO sa tibuok nasud nga si Alfonso Tan nagpatuga-tuga man sa pagpakanselar sa tanang deputation sa mga polis, traffic enforcers nga kawani sa mga Local Government Units ug mga Non-Government Organizations.

Wala may problema kun si Tan dili na mo-deputize og road law enforcers kay iya man g’yud na sa LTO ang tahas pagpanakop sa mga drayber nga nakahimo’g kalapasan sa lagda sa Transportation and Traffic Code.

Apan nakita man gud nato nga inutil kaayo ang LTO sa pagpanakop sa mga malapason kay wala man gani kita makakita nga naghimo sila og operation. Mao kini ang rason nga daghang drayber ang miabuso.

Unsa na man lay tahas sa LTO? Ang pagpangolekta na lang og bayad sa rehestro ug lisensya sa mga drayber? Kun may mga opisyal man sa LTO nga nagtinapolan, angay unta nga si Tancinco kay Sugboanon, kinahanglang mopakita sa iyang labok batok sa mga badlongong drayber.

***

Awardee na man ‘sab diay si higala’ng PROBE Team chief Raquel Arce sa Cebu City Government atol sa Charter Day Anniversary. Maayo unta og niini’ng subsob nga pagpasidungog ni Arce, makapaikag pa kini kaniya nga doblehon niya ang iyang lihok paghawan sa atong mga karsada gikan sa mga mapahimuslanon.

Kagahapon nakaagi ko sa dalan Sikatuna dapit sa eskena T. Padilla ug nakita nako nga adunay tawo nga nagtrabaho. Mura’g nasabtan nako nga ang gitrabaho kabahin kini sa usa ka balay nga anaa milapas na sa karsada.

Awhagon nako si higala’ng Raquel nga susihon niya kini’ng dapita ug pahawanan gikan sa mga nakahatag og kasamok. Ang dalan Sikatuna lapad baya kini nga karsada kaniadto apan anam-anam nga nagkagamay.

Ang eskena nga bahin sa Sikatuna, apil na ang dalan T. Padilla, aduna pa’y aseras kaniadto nga maagian ang mga tawo. Tungod sa kahakog sa puwesto, ang mga nagpuyo daplin sa karsada mipaaginod ngadto sa karsada ug nakasakripisyo sa pag-agi sakyanan.

Akong balikon nga kun motrabaho lang g’yud ang mga sakop sa PROBE, sigurado nga mahawan ang atong dakbayan. Giingnan ko ni higala’ng Arce nga adunay mga higayon nga gipugngan ang iyang mga bukton.        

Mao ba? Unsay buot nimo ipasabot? Kun ang iyang gipasabot mao nga gusto siya’ng motrabaho apan adunay mopugong-pugong, biyai na nga katungdanan isip protesta kay kun anaa ka lang gihapon diha og dili makatuman, law-ay kaayo tan-awon.

Itug-an sa media higala kun adunay problema sama sa pagpugong sa mga tawo nga dili ka makalihok.

***

May mga dapit baya nga akong gireklamo, nahawan diha nga gihatagan og aksyon sa City Hall. Apan ingon ana na lang diay kita kanunay? Kun may reklamo trabahuon apan kun wala pasagdaan lang?

Dili kini maoy tukma kay pananglit walay moreklamo nga media ug mopugos nga lihukon ang angayan nga trabahuon, moabot ang higayon nga wala nay karsada. Nahinumdom ba kamo sa Rallos Street sa Barangay Suba nga hingpit nga nahanaw?