Buwak sa Malakanyang

Napahimutang nang haya ni PO1 Romeo Cempron sa St. Peter Memorial Chapels sa Mandaue City dihang may nipahibawo sa iyang biyuda, si Dr. Christine Abucay-Cempron, nga may bag-ong buwak nga niabot. Giingnan siya nga ang korona sa buwak gikan sa buhatan ni Presidente Noynoy Aquino.

Mas nakugang siya sa gipadayag nga awhag sa Malakanyang: Mahimo bang ipahimutang ang buwak kilid sa lungon? Ug mahimo bang letratohan aron mahibawo ang palasyo nga natuman ang sugo? Si Christine, nga nakapugong sa iyang emosyon sukad sa pagkahibawo sa trahedya hangtod sa pagsugat sa patayng lawas sa Villamor Air Base ug sa pagkuyog ini balik sa Sugbo, wa nang katago sa iyang kahimangod.

* * *

Sama sa ubang mga tagtungod sa 44 ka SAF commandos, kaubanang mga polis ug nagpakabana nga katawhan, nagsugod ang kahimangod ni Christine sa kakuwang sa simpatiya ngadto sa mga biktima sa labing unang mensahe ni Presidente Aquino sa trahedya tulo ka adlaw human sa duguong engkuwentro sa Maguindanao.

Nisamot ang iyang kasuko dihang gipili ni Aquino ang pagtambong sa inugurasyon sa planta sa Mitsubishi sa Sta. Rosa City sa Laguna inay pagsugat sa mga patayng lawas sa SAF commandos sa Villamor Air Base ug sa giisip nga taphaw nga mensahe atol sa necrological service nga gihimo sa headquarters sa SAF sa Kampo Bagong Diwa sa Taguig.

* * *

Apan nagpabiling malaumon si Christine nga makabati og mas makahuloganong mensahe atol sa pakigtagbo ni Aquino sa matag pamilya sa mga biktima niadtong Biyernes sa gabii. Gipakaingon tuod sa kadaghanan nga nakabawi si Aquino kay nilungtad ang iyang pakigsulti sa mga pamilya hangtod sa kadlawon pagka Sabado.

Nahugno si Christine nga ang mga tigom gi-dokumento sa TV crew sa Malakanyang. Hingpit na gyong nawa ang iyang paglaom sa presidente dihang, inay mopadayag sa kinasingkasing nga pahasubo sa ilang trahedya, nidiretso  hinuon og pangutana kon unsay pangayuon sa mga pamilya gikan sa iyang pamunoan.

* * *

Bisan niulbo nang kasuko pag-abot sa buwak gikan sa Malakanyang, nakaginhawa og lawom ug nakahunahuna si Christine nga ang sinugo, mahimong kawani sa flower shop, di makiangayon nga maoy iyang pahungawan. Gipasabot hinuon niya nga igo nang natuman ang tahas sa paghatod sa mga buwak ug di na makabuot asa nila ipahimutang ug unsay ilang himuon sa mga buwak.

Mga paryente na sa mga Cempron ug mga Abucay ang nitudlo namo sa higanteng korona sa buwak gikan sa buhatan ni Presidente Aquino--gipahimutang sa kinatumyan sa taas nga lumbay sa mga buwak, kinalay-an sa haya sa ikaduhang andana sa punerarya. Lab-as pang tan-awon ang puti nga mga buwak apan ang bugtong nahibilin mao na lang ang gold nga ribbon nga may markang "Condolence," wa nay bisan unsang timaan diin gikan.

[email protected]