Bakak nga super typhoon

Hinaot nga wa pa kang kalimot kinsay nanghadlok nimo pinaagi sa text o sa social media nga motugpa sa di pang Piyesta Senyor sa Sugbo ang laing super typhoon nga gitawag na nilang daan nga Yolanda II ug gipasidaan gani nga mas kusog pa kay sa orihinal nga Yolanda niadtong Nobyembre 8.

Bisan gipasabot na sa Philippine Atmospheric, Geophysical and Astronomical Services Administration daghan ang wa magpabadlong sa ilang kaalarma. Nga ila gani hinuong gipakatap ngadto sa mas daghan pa. Nga maoy ampay ug orihinal nga tuyo sa balhibuon og utok nga mga tigpasiugda: Ang pagpaukyab ug pagmugna ug kalibog ug kayagaw.

***

Karong way super typhoon nga niabot, palihug hinumdomi kinsa ang mga iresponsable nga nisuway pag-ilad nimo. Timan-i sila. Hinaot nga susihon na ang sunod nila nga kasayuran sa di pa ipakatap. Mas maayo gani nga tabangan pinaagi sa pagpasabot nga di maayong magpagamit sa pagpangilad, kana kon di sila maoy mga tigpasiugda.

Hinaot nga karon nakamatngon na ka nga di mahimong saligan dayon ang bisan unsang kasayuran nga madawat gikan ni bisan kinsa. Hinaot nga kahibawo na unsay mga tinubdan nga kasaligan ug kinsay mapangutana unsa katukma ang nadawat nga kasayuran sa di pa ipakatap ngadto ni bisan kinsa, bisan sa mga sakop sa imong kaugalingong pamilya o kahugpongan.

***

Gawas nga way super typhoon wa pa gyoy bagyo nga naumol. Ang low pressure area (LPA) nga nisud sa teritoryo sa Pilipinas niadtong Biyernes sa hapon wa mahinayon pagkahimong bagyo niadtong Sabado sa buntag. Gihulagway ni Pagasa Visayas Director Oscar Tabada nga katag ug mas dako ang kahigayonan nga mabungkag kay sa mahimong bagyo.

Wa gyod tinuoy klaro ang lihok, morang naglibog asa padung ang LPA: Nagsugod duol sa General Santos, dayon nisaka sa Surigao, apan nibalik pag-us-os ngadto sa Cagayan de Oro, sa wa pa mosaka ngadto sa Butuan, dayong us-os na sab ngadto sa Dipolog.

***

Bisan wa mahimong bagyo lapad ang kadaot nga nahimo. Dul-an sa 20 ang namatay ug mas daghan ang naangol tungod sa lapad nga pagbaha ug pagdahili sa yuta sa Mindanao ug sa Kabisay-an. Kay bisan hinay rang hangin ang LPA nibubo og daghan, kusog ug way hunong nga uwan.

Apan bisan unsaon pag-inat di gyod super typhoon ang LPA. Sukwahi sa nikatap nga mga pasidaan. Nga gipakapinan pa og mapa aron nga mas makapaalarma sa social media networks. Nipasidaan ang Pagasa nga mobalik ang uwan sa Sugbo karong Sabado ug Domingo, bisperas ug kahulogan sa Piyesta Senyor, liwas na sa orihinal nga pasidaan sa super typhoon. Mahimong sakyan na sab og paukyab nga mga pasidaan. Hinaot nga naleksiyon na ta. Ug di na magpasud sa bolsa.

***

Email: [email protected]