Unsaon pagsulbad sa Commission on Elections (Comelec) ang konsabo sa abusadong mga politiko ug sakop sa media paglubag sa limitasyon sa kampanya pinaagi sa media? May ipatuong balita ug interviews sa media nga binayran diay sa mga politiko pagpalambo sa ilang kandidatura ug pagdaot sa ilang mga kaatbang.
Gawas nga pangilad sa mga botante, panikas pa gyud sa mga lagda sa Comelec nga ang nasudnong mga kandidato makapangampanya hangtod 180 ka gutlo sa radyo ug 120 ka gutlo sa telebisyon ug ang lokal nga mga kandidato hangtod sa 90 ka gutlo sa radyo ug 60 ka gutlo sa telebisyon.
***
Kining maong binuang nakapatuyang sa nangaging mga piniliay nga wa mabaraw sa Comelec ug nakapa-apiki sa mga kandidato nga intawoy kuwarta nga ikabayad sa media alang sa lehitimong political advertisements o sa ilegal nga mga palusot. Sa pagsuway pagputol sa kahiwian, ang bag-ong liderato sa Comelec niluwat sa mosunod nga mga lagda:
“ Kinahanglang mananghid sa Comelec ang mga sakop sa media sa di pa maka-interview sa mga kandidato sa piniliay karong Mayo 13 karong tuiga; ug
“ Angayng hatagan sa kahugpongan sa media og managsamang kahigayonan ang ubang mga kandidato sa pagtubag sa mga pamahayag nga luwatan sa mga piliunon nga mahinabi sa media.
***
Samtang maayo ang tumong sa mga lagda sa Comelec, ang pagpatuman nila mosangpot sa mas dakong kayagaw. Maangin ang lehitimong media interviews nga di binayran kay gitumong lang pagtabang sa mga botante pag-umol sa ilang baruganan sa piniliay. Kon may kandidato pagka senador nga masugatan ang reporter, kinahanglang manawag siya sa Comelec aron pagpananghid o, kon mausab ang lagda, pagpahibawo sa himuong interview.
Kon molungtad og 10 ka gutlo ang interview, kinahanglang pakighinabian sa sibyaanan ug hatagan og managsamang tag-10 ka gutlo matag usa ang laing 32 ka kandidato pagka senador. Sa ato pa, maggapos nang daan ang tunga sa adlaw nilang sibya.
***
Angayng dawaton sa Comelec ang pait nga kamatuoran nga di mahimong di nila mabadlong ang konsabo sa mapahimuslanong mga politiko ug mga sakop sa media. Ang dakong konsuylo mao nga pipila ray maminaw sa kurakot nga mga sakop sa media, ug mas gamay pa gyud ang magpailad nila.
Ang lehitimong mga sibyaanan di mahitabong magpaggamit sa susamang binuang. Sa kahadlok nga mahisama sila sa nangalisbo nga mga sakop sa industriya. Kay kinahanglan mang motuman sa mga lagda aron pagpanalipod sa kaligdong sa ilang operasyon, ang lehitimong mga sibyaanan pulos may kontrata sa ilang mga transaksiyon uban sa mga politiko. May mga dokumento nga masubay ang Comelec pagsubli natuman bang limitasyon di lang sa oras kon dili apil na sa gasto.
***
Email: leo_lastimosa@abs-cbn.com