3,447 pasaway na motorista, huli ng LTO-NCR
MANILA, Philippines — Iniulat ng Land Transportation Office-National Capital Region (LTO-NCR) na umabot sa 3,447 motorista ang kanilang nadakip dahil sa mga paglabag sa batas trapiko nitong Pebrero 2024.
Ayon kay LTO-NCR Regional Director Roque “Rox” Verzosa III, sa pinakahuling datos mula kay LTO-NCR Traffic Safety Unit (TSU) chief Ms. Rocilyn Villaruel, nasa 2,026 motorista ang hinuli dahil sa paglabag sa Republic Act (RA) 4136 o Land Transportation and Traffic Code kabilang na rito ang 301 kaso ng hindi rehistradong sasakyan alinsunod sa “no registration, no travel” policy.
Ayon kay Verzosa, nasa 591 naman ang sinita at hinuli dahil sa pagmamaneho ng sasakyan na may depektibong accessories, devices, at equipment.
Kabilang sa hinuli ang mga nagmamaneho ng nakatsinelas, nasa 314; walang OR/CR, 225; reckless driving, 126, at walang driver’s license, 89.
Nasa 1,009 motorista rin ang hinarang dahil sa hindi paggamit ng seat belt devices, na paglabag sa ilalim ng Republic Act (R.A.) 8750 habang 391 riders nasita dahil sa kawalan ng helmet (R.A. 10054), 15 dahil sa hindi pagsunod sa Children Safety on Motorcycle law (R.A. 10666), at anim sa paglabag sa Anti-Distracted Driving Act (R.A. 10913).
Kasabay nito, nakahuli rin ang Department of Public Works and Highways (DPWH) ng 587 motorista dahil sa paglabag sa R.A. 8794, o Anti-Overloading Act habang 69 naman ang naharang Philippine National Police (PNP) sa paglabag sa R.A. 10054 at 130 sa iba pang violations.
Dagdag pa ni Verzosa na ang naturang operasyon ay alinsunod sa kautusan nina Transportation Secretary Jaime “Jimmy” J. Bautista at LTO Chief, Assistant Secretary Atty. Vigor D. Mendoza II.
- Latest
