Road rage suspek sa Quezon City tugis
MANILA, Philippines — Nagsasagawa na ngayon ng beripikasyon sa Land Transportation Office (LTO) ang mga tauhan ng Quezon City Police District (QCPD) laban sa driver ng isang SUV sa isa na namang insidente ng road rage kamakalawa ng umaga sa nabanggit na lungsod.
Ayon kay PSSg Babes Bien Santos ng QCPD, tumawag sa Street Watch 911 ang biktimang si Joey Sy, 36, operation manager at residente ng Lagro, Quezon City upang ireport ang driver na kanyang nakaalitan.
Ayon sa biktima, alas-9:30 ng umaga nitong Huwebes nang muntik na silang magkabanggaan ng driver ng Mitsubishi Montero sa Elliptical Road.
Ngunit pagdating sa panulukan ng Quezon Avenue at West 4th, naglabas ng baril ang driver ng SUV.
Dahil sa takot, pinaharurot ng biktima ang kanyang sasakyan patungong airport kung saan ihahatid ang kanyang pamilya.
Sa kawalan ng dash cam, piniktyuran na lamang ng biktima ang plaka ng sasakyan ng suspek.
Inaaral na rin ng pulisya ang CCTV footage sa lugar na maaaring makatulong upang malaman ang pangyayari.
- Latest