Tauhan ng Coast Guard na nag-viral sa reckless driving, iimbestigahan
MANILA, Philippines — Nasa ‘hot water’ ngayon ang isang junior officer ng Philippine Coast Guard (PCG) na sangkot umano sa reckless driving sa South Luzon Expressway na nag-viral ngayon sa social media.
Sinabi ni PCG Commandant Admiral Ronnie Gil Gavan na magsasagawa sila ng “parallel investigation” para madetermina ang naging paglabag ni Coast Guard Ensign Alain Anthony Agpalo.
Makikipagtulungan din ang PCG sa Land Transportation Office (LTO) na nagsasagawa rin ng sariling imbestigasyon.
“Here in the Philippine Coast Guard, we do not tolerate officers or personnel violating existing laws and regulations implemented by other agencies. They must face the consequences of their actions,” sabi ni Gavan.
Noong Enero 4, nakatanggap ang PCG ng liham mula sa LTO na nakasaad na nakilalang si Agpalo ang motorcycle rider na umano’y ilegal na pumasok sa SLEX at tumangging huminto nang i-flag siya ng mga enforcer. Inatasan si Agpalo na humarap sa LTO noong Lunes.
Pinagsusumite si Agpalo ng “written explanation” para ipaliwanag ang sarili. Kapag mapatunayan ang pagkakasala, sasampahan ng kasong administratibo si Agpalo at posibleng kanselahin ng LTO ang kaniyang lisensya.
Ayon sa PCG, natapos ni Agpalo ang kanyang pagsasanay sa Coast Guard noong Oktubre 2019 saka nanumpa bilang opisyal na miyembro.
- Latest
