Rambol sa Caloocan: 1kritikal

MANILA, Philippines — Nasa kritikal na kondisyon ngayon ang isang pedicab driver nang tamaan ng bala sa nangyaring rambulan dalawang grupo ng magkakaibang barangay sa Caloocan City.

Inoobserbahan sa Manila Central University Hospital sa tinamong tama ng bala sa likod at kanang braso ang biktimang si Jasper Querol, 30, alyas Cholo ng Katarungan St., Brgy. 148.

Naaresto naman si Lawrence Aplacador, 19, ng Brgy. 153 at ang nasagip na 15 -anyos na si alyas Buda, habang pinag­hahanap pa ang iba pang mga suspek na si Arnel Reyes ng Brgy. 153, Raizon Dela Cruz, ng Brgy. 150, Jerome Castor ng Brgy. 153 at isa pang menor-de-edad na si alyas Axel. Sa ulat kay Caloocan Police Chief PCol. Ruben Lacuesta, nag-iinuman ang biktima at mga suspek, kasama ang dalawang menor-de-edad sa kanto ng Batangas at Cavite Alley, Brgy. 153 dakong alas 3:15 ng hapon nang magkaroon ng mainitang pagtatalo hanggang sa mauwi ang mga ito sa rambulan.

Nagpaputok umano ng baril si Dela Cruz na ginantihan naman ng putok ni Reyes na tumama sa likod at kanang braso ni Querol na agad isinugod sa nasabing pagamutan.

Agad na nagsagawa ng follow up operations ang pulisya na nagresulta sa pagkakadakip sa dalawa sa mga suspek.