Miyembro ng drug group, arestado
MANILA, Philippines — Arestado ang isang miyembro ng criminal group at dalawa pang indibidwal nang maaktuhan nagsusugal sa Taguig City, madaling araw ng Huwebes.
Sa ulat ng Taguig City Police Station, ang nadakip na si Bernie Descutido, 37, construction worker, na naberipikang kasapi sa ‘Loloy Drug Group’ at gun-for-hire.
Kinilala ang dalawang pang naaresto na sina Christian Joy Joel Ayatin, 20; at Christopher Jeff Mapili, 27.
Dakong ala-1:00 ng madaling araw kahapon nang madatnan ng mga pulis ang tatlo sa pagsusugal sa 7th St., Brgy. Katuparan, Taguig City, kung saan nakumpiska ang taya, habang si Descutido naman ay nakuhanan ng isang baril na kargado ng bala ng kalibre .38.
Nang isagawa ang beripikasyon, natuklasang si Descutido ay miyembro ng nasabing grupo criminal group.
Nakatakdang ipagharap si Descutido ng reklamong paglabag sa Presidential Decree 1602 (illegal gambling) at karagdagang reklamo para sa paglabag sa RA 10591 (Illegal Possession of Firearm and Ammunitions) habang ang dalawa ay paglabag sa PD 1602.
- Latest