Desisyon ng DOJ sa drug case ni Ongpin, hinihintay ng PNP
MANILA, Philippines — Hinihintay pa ng Philippine National Police (PNP) ang magiging desisyon ng Department of Justice (DOJ) laban kay Julian Ongpin, ang boyfriend at person of interest sa pagkasawi ng artist na si Bree Jonson .
Ito ang inihayag ni PNP Chief P/Gen. Guillermo Eleazar na sinabing welcome sa PNP ang mga kaganapan sa reklamo sa droga na inihain laban kay Ongpin.
Nabatid na tinapos na ng DOJ ang imbestigasyon at isinumite ang drug complaint laban kay Ongpin, anak ng negosyanteng si Roberto Ongpin para sa resolusyon dahil wala ng iba pang isyung lumutang sa nasabing kaso.
“Sa ngayon, hintayin na lamang natin ang magiging desisyon sa isinampang reklamo laban kay Julian Ongpin. Buo ang ating tiwala na madedesisyunan nang tama ang reklamong ito laban sa kanya,” ayon sa PNP Chief.
Ang drug complaint laban kay Ongpin ay kaugnay ng pagkakarekober ng mga awtoridad sa 12.6 gramo ng cocaine sa loob ng kuwartong tinuluyan nila ni Jonson sa isang beach resort sa La Union.
Sa nasabing kuwarto rin natagpuang patay si Jonson noong Setyembre 18 kung saan duda ang pamilya nito na may naganap na foul play. Si Jonson ay inihatid na sa kaniyang huling hantungan sa Davao City noong nakalipas na linggo.
- Latest