Suplay ng bakuna sa CAMANAVA, limitado na rin
MANILA, Philippines — Inihayag ng mga lokal na pamahalaan sa CAMANAVA area na naglimita na rin sila kahapon ng operasyon nang pagbabakuna sa COVID-19.
Walang iskedyul kahapon sa Caloocan City ng first dose. Tanging second dose lang ang binakunahan.
Ang mga naka-schedule namang higit 3,000 residente para sa una at ikalawang dose sa pitong vaccination site ang nabakuhahan sa Malabon.
Maging ang Navotas ay nag-anunsiyo rin na mga nasa A1 hanggang A3 lang ang babakunahan nila, at pansamantalang ihihinto ang pagtuturok sa essential workers dahil sa limitadong suplay ng bakuna.
Sa Valenzuela City, tuloy ang pagtuturok sa siyam na COVID-19 vaccination sites, pero para lang muna ito sa mga babakunahan ng second dose.
Ayon kay Dra. Beng Cruz, ang team leader ng kanilang vaccination program, paubos na rin ngayong linggo ang suplay nila ng ikalawang dose ng Sinovac.
Nag-anunsyo rin ang LGU sa kanilang social media account na habang naghihintay ng karagdagang suplay ng bakuna, hindi muna ito mamamahagi ng vaccination appointment para sa mga tatanggap ng unang dose sa lahat ng vaccination site sa lungsod.
- Latest
