Pasahero ng MRT-3, kumonti
Dahil sa banta ng Covid-19
MANILA, Philippines — Maging ang mga pasaherong sumasakay ng Metro Rail Transit Line 3 (MRT-3) ay kumonti dahil na rin sa takot na mahawa ng sakit na COVID-19.
Sinabi ni Engr. Mike Capati, Director for Operations ng MRT-3, bumagsak sa 240,000 ang daily average ng mga pasahero mula sa mahigit 350,000 noong mga nakaraang buwan.
Aniya, ang takot ng publiko sa COVID-19 ay pangunahing dahilan ng malaking bawas ng mga pasahero ng MRT-3.
Maging ang kanselasyon ng mga klase sa pampubliko at pribadong paaralan sa lahat ng antas ay dahilan din sa pagkonti ng mga pasahero.
At bilang tugon sa mga ipinatutupad na precautionary measures, nagagamit na ang mga thermal scanners sa ilang istasyon ng tren habang kasalukuyang idinideliver ang iba pa.
Nabatid na drum-drum na ring mga alcohol at hand sanitizers ang inorder ng MRT- 3 upang mayroong pangmatagalang maibibigay sa mga pasahero.
Nagsasagawa rin ng disinfection sa mga bagon ng tren kapag ito ay dumating sa mga dulo o huling istasyon ng tren bago muling pasakayin ang mga pasahero.
Namahagi rin ng mga face mask at surgical gloves ang pamunuan ng MRT sa kanilang mga empleyado at guwardya.
Una rito ay iniulat din ng pamunuan ng LRT-1 at LRT-2 ang pagkonti ng kanilang mga pasahero dahil sa takot sa COVID-19.
- Latest