JoyRide registration, dinagsa
MANILA, Philippines — Libu-libong motorcycle riders ang dumagsa kahapon ng umaga sa idinaos na JoyRide’s Biker Registration event, isang transport sector, para maging compliant sa itinakdang 10,000 cap ng motorcycle taxi ng Department of Transportation-Technical Working Group (DOTr-TWG), sa Liwasang Bonifacio, sa Ermita, Maynila.
Tinatayang nasa 3,000 ang nagparehistro kabilang ang nasa 350 Kasundo Bikers na nagtungo sa nasabing event na inorganisa ng Quezon City Gladiators simula alas-7:00 ng umaga at nagtagal hanggang alas-11:00 ng umaga.
Bukod sa JoyRide, inimbitahan din ang Move It sa nasabing biker’s registration subalit tumanggi ang huli, sa pagnanais na maituloy ang legalization ng motorcycle taxi hailing app sa bansa.
“We want them to give them [the riders] a chance. We chose Manila because it is the center, capital. Malaki ang lugar, para ‘yung mga gusto maging rider madali lang sa kanila kasi nasa sentro. Plano rin namin mag-organize ng ganito sa other cities of Metro Manila,” ayon kay Moises Gomez, senior representative ng QC Gladiators.
Binigyang-diin ni Gomez na dapat ang iba pang stakeholders ay makapag-comply din sa extended pilot run para makapagtuluy-tuloy sa operasyon ng motorcycle taxis.
“Kapag naipasa ito sa Kongreso maraming tao ang makikinabang hindi lang iisang tao kasi grabe na talaga ang traffic ngayon sa Metro Manila kaya lang lahat ng sasali rito sa pilot run study ng technical working group dapat maging compliant sila, strict sila sa guidelines at saka sa direktiba ng LTFRB,” paliwanag pa ni Gomez.
Sa kasalukuyan, ang JoyRide ay may 1,800 riders nang tumatakbo. May 6,907 nang nakarehistro nitong Disyembre 2019 at inaasahang mapupunan na nito ang 10,000 cap sa pagdagsa kahapon ng nagparehistro.
- Latest