Higit sa P1 milyong paputok, winasak

MANILA, Philippines — Lagpas sa P1 milyong halaga ng mga paputok at mga pailaw na nakumpiska ng pulisya sa Kamaynilaan nitong nakaraang pagsalubong sa Bagong Taon ang winasak ng National Capital Regional Police Office (NCRPO).

Pinangunahan ni NCRPO director BGen Debold Sinas ang pagsira sa mga iligal na paputok na aabot sa kabuuang halaga na P1,040,874.

Ang pagsira sa mga nakumpiskang paputok ay bilang pagtupad ng pulisya sa Presidential Memorandum Order no. 31 ni Pangulong Rodrigo Duterte na nag-aatas sa Philippine National Police at iba pang ahensya na ipatupad ang regulasyon sa pagbebenta, distribusyon at paggamit ng mga tinukoy na iligal na paputok at pailaw.

Kabilang sa mga nakumpiskang paputok ang Picolo, Super Lolo, Lolo Thunder/Atomic/Big Triangle, Pla-pla, Boga at iba pa na tinukoy sa RA 7138 na nagsasaad naman ng mga regulasyon sa mga ‘pyrotechnic devises’ sa bansa.  Ang iba naman tulad ng mga Luces at Kwitis ay nakumpiska dahil sa kawalan ng permit ng mga negosyante para itinda ang mga ito.

Una nang sinabi ng pulisya na ang mahigpit na pagpapatupad ng mga batas laban sa mga iligal na paputok ang isa sa dahilan ng mapayapang selebrasyon ng pagsalubong sa Bagong Taon at Pasko.